Online Reporter
Nkosilathi Sibanda
ZIPHUMA ziphihlika emzini weBulawayo Chiefs nanko kuvela ukuthi leliqembu lasebenzisa umdlali ongabhaliswanga ngokusemthethweni kuligi yeZifa Division One, kumhlubulo ongezansi kwelizwe.
Sekube lesikhalazo esibekwe liqembu leHwange sokuthi Amakhosi Amahle adlalisa uAnesu Saiti ngesikhathi ebhaliswe lakuBulawayo City, kusigaba sakuqala seligi.
USaiti, owebolekwa koBulawayo City evela Black Mambas, waphatheka kumidlalo engu-12 ekuqembu leCity, qede lapho wabonakala ekuChiefs mhlaka 5 Ntulikazi.
Kuncwadi yokubeka isikhalazo, iHwange ithe iBulawayo City kayizange imesule uSaiti ukuthi ayedlala kwelinye iqembu. Iqembu leHwange lithe ukudlaliswa kukaSaiti kwephula isiqephu somthetho ku18.1 wemilayo leziqondiso zeligi.
“Umdlali lo webolekwa kuBulawayo City evela kuBlack Mambas. Wavunyelwa yiBlack Mambas ukuthi ayedlala kuBulawayo Chiefs.
“UAnesu Saiti wadlalela amaqembu amabili ngesigaba sinye, sakuqala sesizini. Lokhu kwenza ukuthi abonakale kumidlalo emithathu ebhekane leHwange ngesizini inye.
“Wadlalela iBulawayo City kanye, wadlala kabili kuBulawayo Chiefs. Sibeka isikhalazo sokuthi iBulawayo Chiefs yasebenzisa umdlali ongabhaliswanga kakuhle ngeviki lesi-13, bedlala leHwange FC,” kutsho isikhalazo lesi.
Ukubekwa kwalesi isikhalazo kulakho ukuphazamisa umbango wesicoco esikhulu kuDivision One.
Okwakhathesi iBulawayo Chiefs ihlezi esiqongweni selogu, ilemiklomelo engu-67, ilandelwa yiHwange ele-62. Nxa iBulawayo Chiefs kungatholakala ukuthi yenza iphutha, ilakho ukuthi ijeziswe ngokukhitshelwa imiklomelo, kubenzima ukuthi ibambelele phezulu.
Kuzakuba lithuba elihle njalo kuzimbamgodi zamalahle ukuthi zikhokhele, zigcwalisise isifiso sokuphenduka kuPremiers League ngesizini ezayo.
