Online Reporter
Nkosilathi Sibanda
UMSEBENZI wokwakha umduli wothango lwenkundla yeClub House yeHighlanders uqhubekela phambili njalo kulesithembiso sokuthi kusiya fika uNhlolanja ngomnyaka ozayo uzabe usuphelile.
Kukhangelelwe ukuthi ngesikhathi sekuthakazelelwa iminyaka elikhulu yokusungulwa kweHighlanders, iguma leClub House lizabe seligonjolozelwe ngumduli lo ngokupheleleyo.
Okwakhathesi lumduli usuvale iphambili yeClub House, kumgwaqo kaFife Street lapho osekubekwe khona igedi elingena izimota kunye labantu eceleni.
Ukwakhiwa kwalumdluli besekubuyele emuva kuminyaka edluleyo ngembangela yokuthi iHighlanders ilesikwelede kukhansili yakoBulawayo.
Umduli lo ugombolozela iguma leClub House nge-800m njalo wakhiwe ngohlobo lwezitina olubizwa ngokuthi yi-hydraform, ezilakho ukuhlala isikhathi eside.
Kulandela ukukhulumisana lekhansili, iBosso iqhubeke ngokwakhwa kodwa, phakathi kwalumnyaka kuphinde kwaba lenye inkinga ngokusilela kwesamende kuleli, okuphinde kwadala ukuthi kukhwele lentengo yaso.
Inkampani ephiwe umlandu wokwakha lumduli, i-Astra Building Supplies izimisele ukuthi isebenzele ukuthi kusiyafika uNhlolanja, ibe isiqede umsebenzi.
Lokhu kuqinisekiswe ngumqondisi walinkampani uJabulani Sibanda ngesikhathi ekhuluma lephephandaba likazulu ngoLwesibili.
“Inhloso yikuthi siqede ukwakhiwa kwalumduli. Kade umile lumsebenzi ngakho okwakhathesi sizimisele ukuwuqeda,” kutsho uNkomo.
“Inkundla yeClub House yindawo eyinsika kumbali yeHighlanders, ngakho ukuba khona komduli lo kubaluleke kakhulu. Sibonga usekelo lwemali ekhitshwe nguSir Wicknell Chivayo, okusize kakhulu ukuthi umsebenzi uqhubekele phambili. Singakhohlwa njalo ukuthi leli kwakuliphupho likamuyi uNdumiso Gumede owayengumaqhuzu weqembu.”
Umgcinisihlalo weHighlanders uKenneth Mhlophe uthe: “Kuyajabulisa ukubona umsebenzi lo uqhubekela phambili. Ngesikhathi usiyaphela, kuzajabulisa abantu abanengi.”
