admin
Buhlebenkosi Gaule
ISIKOLO se Mpopoma High siwelwe yinhlanhla yamaswazi ngesikhathi sidinga usizo lomzamo wokukhulisa isikolo ngokwakha njalo lokwengezelela izindlu zokufundela zabafundi abafunda ugwalo lwaphezulu.
NgoMqibelo odlulileyo isikolo seMpopoma besimeme omkhulu wabalweli bombangazwe uRetired Colonel Tshinga Dube, uMphathintambo wesabelweni sakoBulawayo uKhomuredi Eunice Nomthandazo Moyo, abazali, abafundi ababefunda kulesisikolo asebengabantu abasebenzayo ukuba babuye bazoncedisa isikolo seMpopoma High.
URetired Colonel Tshinga Dube uzinikele ukuba uzancedisa ukuze isikolo sakhe izindlu ezintsha zokufundela ngokunika isikolo lesi izitina eziyi 10 000 ukuba umsebenzi wokwakha uqalise. Inkampani yeMeezy Bricks eyenza izitina inikeze isikolo izitina eziyi 5 000 lazo ezizanceda ekwakhiweni kwezindlu zokufundela.
Ngaphandle kwezitina, iMpopoma High School ithole izamende ezingu 70 ukuze umsebenzi wokwakha usungulwe kusesemasinya ngoba umphathi wesikolo uMnu Christopher Dube uchaze ukuba isikolo silokhe silezindlu zokufundela ezazakhiwe ukuba kufundele abafundu abayi 300 nje kuphela kodwa khathesi isikolo silabafundi abalenani elingafika 2 000.
UMnumzana Jonah Chisirimunhu ongumgcinisihlalo weSchool Development Committee (SDC) yesikolo seMpopoma High ukhuthaze abazali ukuba babambane babelomoya munye ukuze isikolo sikhule, singakhuli kuphela ngenani labafundi kodwa lezakhiwo zikhule ukuze abafundi benelise ukufunda benga minyananga.
“Bazali ngiyacela ukuba sibelenhliziyo ezinakanelelanayo ukuba abantwana nxa besesikolo lina njengabazali lithi abantwana bethu basesikolo sethu bakhokhelwa ngumphathisikolo wethu lababalisi bethu lokhu kuzasensa sibekwazi ukusebenzelana ndawonye ngoba silomoya wokubambana”, kutsho uMnu Chisirimunhu.
UNkz Moyo ucine ngokukhuthaza abazali ukuba babhadale imali zesikolo ezifunekayo lokhu kungokunye okuzaphathisa isikolo ukuba sithuthuke.
Online Reporter