Online Reporter
Nkosilathi Sibanda
ASEKUZINGA eliphezulu amalungiselelo omncintiswano wokubhukutsha owe-Eco Cash National Sprint Swimming Gala ozabe umhlaka 17 Mfumfu koBulawayo.
Inhlanganiso yeBulawayo Amateur Swimming Association (BASA) ibika ukuba isiyenze konke okusemandleni ayo ukuthi ababhukutshi bayo balungele ukuncintisa bathole igolide.
Umncintiswano lo kukhangelelwe ukuthi kudibane intshantshu ezivela kuzo zonke indawo lapho okulomdlali wokubhukutsha elizweni.
Usekelo oluvela kunkampani ye-Eco Cash luze ngesikhathi esibaluleke kakhulu, nanko linkampani iphinda ibe yiyo exhasa leqembu lelizwe.
Njengengxenye yamalungiselelo, inhlanganiso yeBASA iqhube umncintiswano wabasakhulayo, kumalanga adluleyo. Bekulaba bhukutshi abaleminyaka yokuzalwa kusukela kweyisithupha kusiya ku-19
Abaqeqetshi abakhulume lephephandaba likazulu babike ukuba basuthisekile ngesimo sababhukutshi babo.
Kusenjalo, amaqembu akoBulawayo aselungiselela ukuthi ancintisele ekuthini agcine isicoco ekhaya. Amathimu la agoqela iCrusaders, Penguins, School of Swimming, and leStingrays Swimming Academy.
Ngomnyaka odluleyo kwabusa iqembu leStingrays, libutha zonke inkezo ezazikhona.
Unobhala weBASA uWayne De Swardt, uthe inhlelo zabo zizalandela okufana lakusizini edluleyo.
“Isizini izaqhutshwa ngokufanayo njengakumnyaka odluleyo. Sikhangelele imidlalo emihle lokuthi ababhukutshi benze kuhle.”
