admin
Cornelius Luphahla
SITHUTHUKA ngamandla isigaba seKenilworth eNyathi nanko phela izakhamizi sezisakha isikolo seEarly Childhood Development (ECD).
Isikolo lesi siqale ukwakhiwa yizakhamizi zakule indawo ekuqaleni kwawonalo umnyaka njalo sibizwa ngokuthi yiPhakamani ECD.
Intatheli ikhulumisane loNkosazana Felina Nyathi wachaza ukuthi okwenza baqala ukwakha isikolo lesi yikuthi esikhona sikhatshana.
“Okwenza sakha isikolo lesi yikuthi abantwabethu bafunda khatshana kakhulu njalo kusuka kube nzima kibo ngoba bayabe bebancane. Lokhu kucina kubangela ukuthi baphuze esikolo.
“Sesiqalisile ukwakha ikilasi yethu njalo silethemba lokuthi kusiyaphela inyanga ezayo izabe isiphelile. Umuzi munye ngamunye savumelana ukuthi ukhiphe izitina ezingu-50 ukuze zenele ukwakha ikilasi enkulu njengoba silemizi engu-59 etshengisa usekelo ekwakhiweni kwalesisikolo,” kutsho uNkszn Nyathi.
UMthunywa ukhulumisane loNkosazana Sizalobuhle Mabhena ongumbalisi wakulesisikolo wachaza ukuthi uhlupho abahlangana lalo yikuswelakala kwemifanekiso kanye lokunye okokufundisa abantwana.
“Ubunzima esihlangana labo esikolo sethu yikuthi asilampahla yokufundisa abantwana egoqela imijingo, odoli, ingwalo zemifanekiso kanye locingo lokuvalela isikolo sethu. Ngakho silesifiso sokuthi aluba uHulumende uyangenela asiphe indingeko zesikolo sethu,” kutsho uNkszn Mabhena.
UMthunywa wenelise njalo ukukhulumisana loMnumzana Micah Jealous Mhlophe ongusobhuku wakulesisigaba wachaza ukuthi isikolo sabo asikabhaliswa kwabezemfundo ngakho basalungisisa ukuthi sibhaliswe.
“Isikolo sethu noma nje singakabhaliswa kuHulumende kodwa sesiqalisile amalungiselelo okuyasibhalisa ukuze siphiwe umbalisi owakufundelayo ukufundisa njengoba khathesi silongazange afundele umsebenzi lo,” kuphetha uMnu Mhlophe.
Online Reporter