admin
Cornelius Luphahla
Izakhamizi zesiqintini seNephiya ngaphansi kukaSobhuku uAlbert Nyathi sezisungule iphurojekithi yokufuya inkukhu ngenhloso yokuzithengisa ukuze zithole inzuzo.
Izakhamizi lezi ezinhlanu ziqale iphurojekithi le ekuqaleni kwawonalo umnyaka.
UMthunywa ukhulume loNkosazana Ester Moyo omunye wezakhamizi ezikule iphurojekithi wachaza ukuthi balenkukhu ezinengi kakhulu noma nje zingakalungeli ukuthengiswa.
“Khathesi silenkukhu ezilenyanga eyodwa ezingu-1 004 kuthi ezilamaviki amathathu zingu-1 025. Ngendlela ezikhula kuhle ngayo kutshengisa ukuthi iphurojekithi yethu iyathuthuka,” kuchaza uNkszn Moyo.
Izakhamizi lezi ziveze ukuthi zafaka imbawula kulesisilugu zisenzela ukuthi inkukhu zazo zikhudumale zingabulawa ngumqando.
Isilugu senkukhu lezi sakhiwa emzini kamgcinisihlalo wale iphurojekithi, uMnumzana Ronnie Mpofu njalo senelisa ukugcina inkukhu ezingu-3 000.
UMthunywa wenelise njalo ukukhulumisana loMnu Mpofu oveze ukuthi baqhatsha umuntu onika inkukhu zabo ukudla.
“Saqhatsha umuntu osikhangelela inkukhu zethu abuye aziphe lokudla. Njengoba nje inkukhu lezi zisidla lebusuku sathenga izibane zokukhanyisa ebusuku.
“Nxa inkukhu zethu sezikhulile sizithengisa koBulawayo kukanti ezinye sizithengisela izakhamizini zakulesisigaba,” kulandisa uMnu Mpofu.
Izakhamizi lezi kubikwa zaqala ukufuya inkukhu ngemva kokufundiswa yinhlanganiso ebizwa ngokuthi yiTurning Matabeleland Green eMaleme Ranch eKezi.
Online Reporter