Online Reporter
Nkosilathi Sibanda
ABADLALI bethenisi bakoBulawayo, uKudzai loKuzivaishe Chapepa, bakhethwe eqenjini elizamela ilizwe kuBillie Jean King Cup Africa Group III ezadlalelwa eGaborone, eBotswana, kusukela mhlaka 13 kusiya ku-18 Ntulikazi.
Iqembu lesizwe labesifazane lizakhokhelwa nguValerie Bhunu, ozakuba ngukaputeni.
Kuleliqembu kulabanye abadlali abagoqela uSasha Chimedza loChanelle Zhuwakini.
ITennis Zimbabwe imemezele iqembu kuleliviki yabika ukuba ilethemba lokuthi abadlali abakhethiweyo balethalenta lokuncintisana lamanye amazwe e-Africa njalo bazaphakamisa ifulegi yeZimbabwe emdlalweni wethenisi yabesifazane.
Ukukhethwa kukaBhunu njengo kaputeni akumangalisi ngoba uleminyaka eminengi emela ilizwe emiqhudelwaneni yamazwe.
Uzabe ekhangelelwe ukukhokhela iqembu elihlanganisa abadlali abasebelolwazi kunye labasakhulayo.
Abadlali abakhangelelwe ukwenza kuhle bagoqela uSasha Chimedza, oqhubeka ethuthuka emidlalweni yamazwe uKudzai Chapepa loChanelle Zhuwakini, abazabe befuna ukuveza ithalenta.
UKuzivaishe Chapepa yena ugcwalisa iqembu elibunjwe ngendlela ehlanganisa ulwazi labasakhulayo.
IBillie Jean King Cup, eyayisaziwa ngokuthi yiFed Cup, ingumncintiswano omkhulu emhlabeni wonke ogoqela ndawonye amaqembu esizwe abesifazane emdlalweni wethenisi. Umncintiswano we-
Africa Group III unika amazwe ithuba lokukhwela aye kumaqembu asezingeni eliphezulu lokunika abadlali ithuba lokuthola ulwazi lokuncintisana emazingeni aphezulu.
IZimbabwe iya eBotswana ilethemba lokwenza kuhle lokuqhubeka ivuselela isithunzi sayo emdlalweni wethenisi e-Africa ngemva kweminyaka yokungaqhubi kuhle.
ITennis Zimbabwe inxuse uzulu ukuthi asekele iqembu lesizwe, isithi abadlali bakulungele ukuncintisana ngokuzimisela, ukubekezela lokumela ilizwe ngesithunzi.
