admin
Indikimba – Ezemvelo
Imbongi nguRobert N Mele
Isihloko senkondlo – Ijogwe lobudala
Imbongi lapha ikhuluma ngendaba enzulu njalo eqondana lowonkewonke othe waphiwa isikhathi eside sokuthi aphile kulo umhlaba. Le yindaba yobudala. Imbongi iveza ubunzima bokubamdala ngoba zonke izinto sezikhangelane laye.
Konke okwenzakala emulini yakhe kuza kuye. Indlala nxa ingena ekhaya kumbe yimikhuhlane nxa ifika ekhaya wonke umuntu ukhangela kuyo. Iqala imbongi ukusitshela ukuthi le yindaba endala yobudala.
Iyaphambili imbongi isitshela ukuthi lijogwe elinzima elobudala kubani lobani. Uthi abantu kabakubone lokhu.
Ijogwe lobudala leli elinzima ithi phezu komdala lisentanyeni — isebenzise isenzukuthi itshengisa lokhu ithi lithe genxe. Liyayisinda leli jogwe imbongi yikho ibuza ukuthi ngubani ongayikhupha lelijogwe.
Imbongi itshela uzulu ngobunzima balelijogwe lobudala njalo idinga uncedo ebantwini labo abangenelisa ukwethula lelo jogwe.
Lisemahlombe embongi leli jogwe njalo lithule lithe zwi. Liyayisinda imbongi leli jogwe yikho isiveza ukuthi sekunzima phambili — emuva lakho sekukhatshana — Ithi ebantwini ake libone. Iyawuphinda njalo umbuzo ongadingimpendulo idinga usizo ebantwini ithi: “Ngubani ongangikhupha kulelijogwe/Ijogwe elobunzima elobudala”. Lokhu kuyenza icabange kakhulu imbongi ngoba ithi iyabalisa enhliziyweni ukuphuma lokutshona kwelanga.
Iyacabanga kakhulu imbongi ngoba ithi lebusuku ubuthongo buyayiphelela. Lokhu ikugcizelela ngesenzukuthi du.
Lokhu ithi kubangelwa yikukhumbula ngendaba endala, indaba yobunzima bobudala. Okuvela sobala kudaba lwale inkondlo yikuthi indaba yobudala inzima kakhulu ize ifananiswe lejogwe lenkabi nxa zibotshelwe ukulima.
Iqhubekela phambili imbongi ithi loba ilele ithwele ubunzima. Ubunzima balelijogwe lobudala.
Iyaqamba izinto ezinzima ngobudala. Izimfa, amacala lemikhuhlane konke imbongi ithi yingxenye yejogwe lobudala. Iyaqhubeka imbongi iveza okwenzakalayo ngenxa yejogwe elinzima lobudala. Ithi indoda yejazi nansi ikhuleka emzini wayo ngoba sekungene indlala lapha ekhaya. Lokhu ikuveza ngesaga ithi kukhuleka indoda yejazi ngoba
“Ngoba umangoye selal’eziko”. Sekunjalo bonke abemuli yakhe bakhangela kuye.
“Bonke amehlo nhlo kimi/Bethi ngiyixotshe ngoba ngimdala”. Njengoba sekuyiyo umuntu omdala lapha ekhaya nxa sekulohlupho loba yiluphi bonke bakhangela kuye omdala.
Bathi kayixotshe indlala konke lemikhuhlane, bathi kayilwisane layo ngoba yiyo endala. Iphetha lesi sigaba ngokukhala imbongi ngokuthi yazidalela uhlupho ngokuba mdala.
Online Reporter