admin
YiNtatheli kaMthunywa
KULEZELAMANI ezidabuka eSiabuwa eBinga ezivubane zaze zadonsa amehlo kazulu kubangwa impahla zelifa.
Isiga lesi senzakale mhlaka 12 Nhlolanja ngesikhathi umamangala uChrispen Muleya (26) esegumeni langakibo.
Umtshutshisi wecala leli, uMnumzana Bruce Maphosa ubikele inkundla yeBinga emavikini adluleyo ukuba umsolwa uGift Muleya (27) wabhaxabula umamangala ongumfowabo waze wamkhupha amazinyo amathathu kubangwa ibhulugwe likayise, osengumuyi.
Umsolwa wafika ngakibo lapho athola khona kulomamangala. Ekufikeni kwakhe kubikwa wabuza umamangala ukuba impahla zakhe aziphiwa mhla kusabiwa ilifa zingaphi.
Umamangala kubikwa wanika umsolwa amayembe amabili kunye lebhulugwe elilodwa. Umsolwa akuzange kumphathe kuhle lokhu kungakho waqalisa ukuthethisa umamangala emethesa icala lokumtshontshela elinye ibhulugwe.
Kuzwakale ukuba ababili laba baphoselana ngamazwi okwesikhathi eside okwacina kubangela ukuba umsolwa atshaye umamangala ngempama.
Kubikwa bagiqala phansi okwesikhathi eside umsolwa wacina esekhulela umamangala.
Kuzwakale ukuba umamangala wacina ekhitshwa amazinyo amathathu okwenza wayabikela amapholisa okwabangela ukuba umsolwa abotshwe.
Ebuzwa ngumantshi uMnumzana Stephen Ndlovu umsolwa ulivumile icala lakhe lokutshaya umamangala.
Umsolwa uthe watshaya umamangala ngoba wayezondile njengoba wayemtshontshele ibhulugwe lakhe ayeliphiwe nguyise engakabhubhi.
Ngemva kokuzwa ubufakazi lobu umantshi ugwebe umsolwa ukwenza iCommunity Service enkambeni yamapholisa.
Online Reporter