admin
Fairness Moyana
KULEZELAMANI ezine ezidabuka eBinga ezizokhele amalahle ekhanda ngemva kokuhlanganela zahlasela ijaha likadadewabo ngenduku, amarekeni kanye langehloka besola ukuthandana kwabo.Abane laba bavela eChipale eLusulu ngaphansi kwenduna uSinamagonde.
Kubikwa abane laba akade bemiswe phambi komthethwandaba weHwange bacunulwa yikuthi udadewabo uthandana loAndile Ndlovu.
Abasolwa bahamba lomamangala umango omude andubana bamhlasele bamtshiye esebangwa lezibi.
Kubikwa mhlaka 4 Zibandlela kuwonalo umnyaka ngehola lesikhombisa ekuseni umamangala, uNdlovu wayezihambela labangane bakhe emavinkili eChipale besiya ekhaya behamba ngomgwaqo olokhethe baze bazithele phezulu kwabasolwa.
Umamangala labangane bakhe babona abasolwa becatshe ezihlahleni behlome ngezinduku, amarekeni lamahloka.
Abasolwa ababalisa uKhulumane Ncube (23), Hlasela Dube (24), Petros Dube (24) kanye loLungani Dube (34).
Kubikwa labo ababehamba lomamangala bahle bathi nyawo ngibeletha bamtshiya emlonyeni wengwenya.
Abane laba kubikwa bahle bamgombolozela bamtshaya abafowabo bentombi yakhe.
Umsolwa uKhulumani wamtshaya kabili ekhanda ngehloka kwathi ke abasolwa ababalisa uPetros loLungani bona bamtshaya ngendukU kuthi uHlaselwa wamtshaya ngerekeni.
Umamangala kubikwa wawela phansi waqaleka. Abasolwa bathi bebona lokhu labo bacela ezinyaweni.
Umamangala waze wancedwa ngomunye owayesedlula owahle wamgijimisela ekilinika bamdlulisela esibhedlela seBinga.
Bebuzwa ngumantshi abasolwa akade besetheswa icala lokuzama ukubulala bathe umamangala wabacunula kakhulu ngoba wanyenya ngakibo okutshengisa ukudelela.
Umantshi uMnumzana Mark Dzira uthole abane laba belecala wabapha isigwebo sokuyahlala ejele okweminyaka emihlanu ngamunye andubana abesulele umnyaka owodwa ngesizatho sokuziphatha kuhle.
Umtshutshisi kulelicala bekunguMnumzana Tawanda Sigauke.
Online Reporter