admin
USAZIWAYO elizweni uBabongile Sikhonjwa usedingele iqembu leHighlanders iMedical Aid ezavumela abadlali ukuthi belatshwe mahala.
USikhonjwa, osephosele ibizo lakhe kumbango wokuba ngumgcisinihlalo weHighlanders ubike ukuba ukhulumisana lenkampani ye-Corporate 24 ukuthi kubelula kubadlali beBosso ukuthola usizo lwezempilakahle.
Ukhulume lokhu ngesikhathi ezethula phambili kwabalandeli lamalunga eHighlanders uqobo koBulawayo kuleli iviki.
Uthe konke akuthembisayo uzakwenza ngoba indikimba yomkhankaso wakhe ithi “Izenzo kungemazwi”.
Andubana aziveze koBulawayo, uSikhonjwa useke wavakatshela ePlumtree njalo ukhangelelwe ukuthi ayefika eVictoria Falls, eFilabusi, eGwanda, Beitbridge, Gweru lase-Harare.
Ekhuluma loMthunywa, uSikhonjwa uthe inhloso yakhe yikuletha impumela kuHighlanders.
“Khathesi ngiphezulu kokuphetha inkulumo leCorporate 24, okuzakutsho ukuba kuzakuba le-Medical Aid eqenjini ezasiza abadlali.
Indleko zokwelatshwa lingakhathazeki, kodwa lokhu kuzamele kuvunywe ngabadala beqembu kuqala,” kutsho uSikhonjwa.
Uyifake wayichaya indaba yakhe yokufuna ukuba ngumsekeli kamgcinisihlalo weHighlanders.
Uthe umlandu wakhe ugxile ekuvuseni isakhiwo seHighlanders Club House, izakhiwo lenhlelo zonke, ukuletha ukuthula lokubambana eqenjini, ukwengeza amalunga eqembu lokuphakamisa isisindo seqembu.
Utshayelwe ihlombe umfokaSikhonjwa ekhuluma ngokuthi lesi yiso isikhathi sokuthi iHighlanders itshiyane lokuvalela phandle abasakhulayo, abalakho ukuletha inkalakatha yenguquko.
“Ubukhokheli kumele buqhutshelwane, butshiyelwe abasakhulayo, sibafundise ukuthi kwenziwa njani.”
USikhonjwa uke wabonakala ukuthi ulilunga leBosso elilenhliziyo enhle njalo ulesiphiwo sokuvusa amabhizimusi eqembu.
Ubambe ibhizimusi lokuzithokozisa enkundleni yeHighlanders Sports Club, waphendula lindawo yathandwa ngabantu abanengi, iqembu lathola imali okwesikhathi esithile.
Online Reporter