admin
Thokozile Mbedzi
KULENDODA yelokitshini leMbundane koBulawayo ebambe amanina amabili iganyavu ngoba ehluleke ukubhadala isikweledi ngeviki ephelileyo.
Umsolwa uNkosi Lovemore Gumbo oleminyaka yokuzalwa engu-33 udlwengule amanina la aleminyaka engu- 26 le 30 njalonje andubana awakhulule.
Kubikwa umsolwa wenze lokhu ngoba amanina la amabili ehluleka ukumbhadala imali ayemthembise yona ngemva kokuba ecele ukuthi akhuze ijaha lomunye wabo elaselihlupha.
Ekhuluma lentatheli omunye umakhelwane uNkosazana Marvelous Sithole uthe okwenziwe ngumsolwa kutshiye izakhamizi zeMbundane zitshaqekile.
“Lokhe sihlukumezekile silapha njengabantu abongomama kusizwisa ubuhlungu kakhulu okwenziwe ngumsolwa.
“Abasiki bebunda bathi umsolwa waqhatshwa ngamanina la womabili ukuze ayekhuza ijaha lomunye wabo elaselimhlupha.
Lakanye umsolwa wenza lokhu nanko phela wayethenjiswe ukuthi uzaphiwa imali angenza umsebenzi wakhe.
Kukhanya amanina la ehluleka ukubhadala umsolwa okuyikho okwabangela ukuthi mhla ehlangana labo wabalaya ukuthi baye endlini yakhe ngenkani,” kutsho uNkszn Sithole.
Uthe umsolwa wathi efika labo endlini yakhe walaya elinye inina ukuthi lilale engutsheni andubana alidlwengule.
Wengezelele wathi umsolwa wathi eqeda lapho wadlwengula umamangala wesibili kodwa ngenxa yokuthi lo owesibili wayesesikhathini kasaqedanga wabuyela kowakuqala wamdlwengula ubusuku bonke.
Ekuseni wabalaya ukuthi bangalokothi batshele yiloba ngubani andubana abakhulule.
Amanina la atshela ezinye izakhamizi ezahle zawalaya ukuthi aye emapholiseni kodwa umsolwa kukhaya wahle wadliwa ngumswenya.
Isikhulumi samapholisa ulnspector Abedinico Ncube ebuzwa ngodaba lolu uvumile wathi solufikile ehofisini yabo.
“Udaba lwamanina adlwenguliweyo solufikile ehofisini yethu kungakho -ke amapholisa acebisa uzulu ukuba nxa elohlupho kabikele abantu abalolwazi lomsebenzi ukuze banqabele ingozi ezifanana lalezi.
Amapholisa acela uzulu ukuba aphathisa ukuze isigelekeqe lesi sibotshwe,” kuphetha ulnsp Ncube.
Online Reporter