Online Reporter
Nkosilathi Sibanda
UKUFAKWA kwezibane emgwaqweni ezisebenzisa amandla elanga kuMasiyephambili Drive, koBulawayo, sekuguqule indawo eyayisaziwa ngokuhlaselwa kwabantu yizigebengu yaba ngomunye wemigwaqo ephephileyo edolobheni.
Umgwaqo lo, lapho okulezibane zamandla elanga, udlula emalokitshini e-Old Magwegwe usiyafika eMakhandeni.
Abatshayeli bezimota labahamba ngenyawo bathe kusukela ikhansili yakoBulawayo yafaka izibane lezi ngo-2014, amacala okubanjwa inkunzi asehle kakhulu njalo abantu sebehamba bekhululekile lasebusuku.
UMnumzana Jabulani Ncube owelokitshini leMagwegwe utshele iphephandaba likazulu ukuthi kudala abantu babegijimela emakhaya nxa sekutshona ilanga ngenxa yokwesaba izigebengu.
“Ngangihlezi ngiphangisa ukuyafika endlini loba ngikhethe ukungasebenzisi lumgwaqo nxa ilanga selitshonile,” kutsho uNcube.
Umtshayeli womtshova uMthulisi Dube uthe ubumnyama babusenza kube nzima ukuthi abatshayeli bame loba imota ilohlupho.
“Bekunzima ukuma kule indawo ebusuku. Abanye abatshayeli babekhetha ukuqhubeka behamba lanxa kukhona okuyabe sekufile. Ubumnyama babunika izigebengu isibindi sokuhlasela abantu,” kutsho lumtshayeli.
Ukhansila kaWard 14, u uDumisani Netha lapho okudlula khona lumgwaqo, uthe izibane zelanga seziveze ukuthi zingaba yisixazululo esihle ekulwiseni ubugebengu ngesikhathi idolobho libhekane lokucitshwa kwamagetsi.
“Ukukhanyisa imigwaqo lendawo zomphakathi kwenza izakhamizi zizizwe ziphephile njalo kunciphisa amathuba okuthi izigebengu zicathamele abantu ebumnyameni,” kutsho uNetha.
Uthe impumelelo kaMasiyephambili Drive isikhuthaze ezinye izakhamizi ukuthi zizenzele okufanayo emalokitshini.
Kwezinye indawo zeCowdray Park, izakhamizi sezibambene zafaka izibane zelanga eduzane kwezitolo, ezititshini zemitshova lalapho okuhlangana khona imigwaqo ngenhloso yokuvimba ubugebengu.
Lokhu sekusabalale lakwezinye indawo ezinjengeLuveve, Pumula leNkulumane lapho izakhamizi ezihlanganyele khona ukukhanyisa indawo ebezilokhu zihlupha ngenxa yobugebengu.
UNkosikazi Nomalanga Moyo oweCowdray Park uthe izakhamizi sezibone ukuthi ukuvikela imiphakathi yazo ngumlandu wazo.
Abahlaziya ezokuphepha bathi ukufakwa kwezibane ezisebenzisa amandla elanga emigwaqweni kungenye yezindlela ezisebenza kakhulu ekwehliseni ubugebengu ngoba kwenza kube nzima ukuthi izigebengu zisebenzise ubumnyama ukufihla imisebenzi yazo.
