Online Reporter
Nkosilathi Sibanda
INHLANGANISO yeZimbabwe Football Association (Zifa) isibike ukuba isiqhatshe uMarian (Mario) Marinica njengomqeqetshi omutsha weqembu lamaWarriors.
UMarinica ungene esikhundleni esasibanjwe nguMichael Nees, oxotshwe ngenyanga edluleyo. Uphiwe inkontileka lomnyaka njalo umsebenzi wakhe wakuqala yikukhuza abafana belizwe kumqhudelwano we-Africa Cup of Nations (Afcon) ngoMpalakazi lonyaka.
Ukukhalipha kukaMarinica kuzabonakala kumidlalo yobungane emibili baphakathi kweZimbabwe le-Algeria kulinyanga.
Esethula umbiko ngokuqhatshwa kukaMarinica, umongameli weZifa uNqobile Magwizi uthe bakhethe ingcitshi.
“Siyajabula ukwamukela umqeqetshi uMarinica eZimbabwe. Uza lobungcitshi lokukhalipha. Impumela yakhe kumidlalo yenze wahamba phambili kulabanye abakade bewufuna lumsebenzi. Ukukhethwa kwakhe kutshengisa ukuzibophezela kweZifa ekuthuthukiseni umdlalo wethu,” nguMagwizi lo.
IZifa ithe uMarinica ulesithupha se-Uefa Pro Licence lePostgraduate Diploma kuSports Coaching njalo useleminyaka eyedlula amatshumi amabili lanhlanu eqeqetsha emazweni lamaqembu e-Europe, Africa, Asia laseSouth America.
Waqeqetsha iArsenal FC, Chelsea FC, Internazionale Milano, AS Monaco, Liverpool FC leTottenham Hotspur. Amazwe awaqeqetshayo agoqela iParaguay, Mauritius, Malawi leLiberia. Ngesikhathi eseMalawi, iqembu leli lafika kusigaba se-Round of 16 kumqhudelwano we-Africa Cup of Nations.
UMarinica uzakuba lomthwalo omkhulu ku-Afcon nanko abalandeli beqembu lelizwe bafisa ukuthi amaWarriors adlalele phambili kwesigaba sakuqala. Kuzalindwa njalo ukubona ukuthi umqeqetshi lo uzakhetha abadlali baphi njengoba kulokukhonona ngalabo abakhona.
Abalandeli bafisa ukuthi kukhethwe labadlali abasakhulayo, ukuze kwakhiwe iqembu lakusasa, endaweni yokuthi kubizwe asebekhulile lalabo asebephelelwe ngumphako.
Kumncintiswano we-Afcon amaWarriors akuGroup B le-South Africa, Egypt le-Angola.
