admin
Thokozile Mbedzi
KULENDODA yesigabeni seMatibhe eBeitbridge ehlaselwe yizigebengu ngamahloka kunye lengqamu emzini wayo andubana zidliwe ngumswenya lemali engange R10 000 kunye lempahla.
UMnumzana Honesty Siziba ubhaxabulwe yizigebengu lezi ndawonye lonkosikazi wakhe esiqintini seMahuhushe ngeviki ephelileyo. Kubikwa ababili laba batshiywe besesimeni esibi.
Kubikwa izigebengu lezi zazithela endlini ngesikhathi belele loNkosikazi wakhe zithwele amahloka kanye lengqamu andubana zibaleke lemali engangeR10 000, impahla ebalisa amakhompuyutha, omakhalekhukhwini abangabiza imali engaba R16 000.
Ekhuluma lentatheli kaMthunywa uMnumzana Tendani Mleya uthe balokhe bethukile ngokwenzakeleyo ngoba akukaze kwenzakale isehlakalo esinje esigabeni sabo.
“Lokhe sethukile ngokwenzakale esigabeni sethu ngoba kungakaze kwenzakale isiga esinje. UMnu Siziba ubezilalele engakhiyanga lesivalo ngoba vele bejayele ukuthi akukaze kube lesiga esinje esigabeni sethu.
“Mina ngokubona kwami kukhanya sokulokuganga osokukhona kuzakhamizi ngoba umuntu ovela khatshana ngeke amane angene nje emzini womuntu. “Sike sazama ukuthungatha umkhondo wezigebengu lezi kodwa sehluleka,” kulandisa uMnu Muleya.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uthe solufikile ehofisini yakhe njalo baxwayisa uzulu ukuba ezame ngazo zonke indlela ukuba azivikele ngokukhiyakanye lokufaka insimbi zokuvimba ukuthi abantu bangene endlini.
“Uzulu kazame ngazo zonke indlela ukuba azivikele ngokukhiya kanye lokufaka ama-burglar bars funa kwesinye isikhathi abantu bengathola usizo amasela esalwisa ukungena,” kuphetha uInsp Mangena.
Online Reporter