admin
YiNtatheli kaMthunywa
INANI labantu asebebulewe yiCovid-19 selifike ku-1103 kusukela ngesikhathi kuqala ukubikwa ukuqhamuka kwegcikwane leli.
Ugatsha olubona ngezeMpilakahle kanye lokondliwa kuhle kwabantwana ngoLwesibili kuyonale iviki luveze ukuthi kulabantu abangu-3258 ababanjwe umkhuhlane lo kukanti abangu-28 babulewe ngumkhuhlane lo.
Inani leli likhuphule inani labantu asebedlule emhlabeni ngenxa yomkhuhlane lo laya ku1103. Abantu asebebanjwe umkhuhlane lo kuleli sebengu-32 004. Mhlaka 24 Zibandlela bekulabantu abangu-255 akade belalisiwe ezibhedlela ezitshiyeneyo.
“Sithole ukuthi kulabantu abangu-28 abafileyo kukanti abasanda kubanjwa umkhuhlane lo bangu-358. NgoMvulo isabelo seMashonaland West yiso ebesilenani eliphezulu labantu abatholakale belomkhuhlane lo (66).
Inani labantu asebefile kweleZimbabwe bebulawa yiCovid-19 selidlule i-1 103 njalo ilizwe lizama ngazo zonke indlela ukulwisa ukumemetheka kwegcikwane leli, nanko phela kuze kwathatha abaphathintambo abathathu bakuleli kunsuku ezimbalwa ezedluleyo.
Kucatshangelwa ukuthi ukuhlasela komhlobo olamandla weSouth Africa ungabe wangena elizweni ngesikhathi izizalwane zakuleli ezihlala elizweni lakomakhelwane zisiza ekhaya kukhefu likaMpalakazi.
Izinga lokusila kwabantu kumhlobo lo olamandla selehle laya ku-71phesenti lisuka ku-82 phesenti mhlaka 1 Zibandlela.
Efuna ukuqinisekisa izakhamizi ezikhathazekileyo, uMongameli u-Emmerson Mnangagwa uthe enkulumeni yakhe kazwelonke (State of the Nation Address) ngoMgqibelo uthe ingcitshi kwezempilakahle zihlola imihlobo etshiyeneyo yemithi yokuvikela umkhuhlane lo njalo ensukwini ezizayo bazaxwayisa uHulumende ukuthi angathenga yiphi imithi.
“Izisebenzi eziphambili zempilakahle ezikhala njalonje ngokusilela kwempahla yokuzivikela, zizakuba ngezokuqala ukuthola i-vaccine le,” kutsho uMongameli uMnangagwa.
Ekuqaleni kwayonale inyanga, kwabekwa umthetho wokuvimba ukuhlangana kwabantu, kwavalwa imgcele yelizwe, kwavalwa njalo amabhizimisi angaqakathekanga kakhulu okwenyanga eyodwa. UMongameli uthe bazimisele njengoHulumende ukufaka eminye imithetho eqinileyo nxa kudingeka.
Online Reporter