admin
SOKUTHOLAKALE isilinganiso sabantu abangu- 558 abalegcikwane leCovid-19 ezikolo eziselizweni njalo uHulumende useqinise imizamo yokwenqabela ukumemetheka kwalumkhuhlane kanye lokuwulawula ezikolo ngaphambi kokuba kufike isikhathi sekhefu leKhisimusi kanye lelomnyaka omutsha.
UHulumende usephume njalo lamasu okukhuphula isilinganiso sempahla yokuzivikela kuleligcikiwane, imithi ebulala igcikwane kanye lemithi yokulelapha ukuze kufinyelelwe indingeko zalokhu ngesikhathi sekhefu.
Isikolo seJohn Tallach esiseNtabazinduna, eMatabeleland North ngesinye sezikolo esihlaselwe kakhulu ligcikwane leli elizweni. Kusukela kuqala ukuqhamuka kwegcikwane leli kulesisiskolo, abafundi abangu-185 sebatholakala belalo okwenza uHulumende waphendula isikolo saba yindawo yokwehlukaniswa.
Izikolo kukhanya yizo esezaba zindawo ezitshisayo zalumkhuhlane nanko phela izibalo zabantu abalalumkhuhlane bezisenyuka. Ngokutsho kogatsha lwezempilakahle kanye lokondliwa kuhle kwabantwana, kusiyafika umhlaka 14 Mpalakazi, ilizwe leZimbabwe beselibhalise abantu abake bagula lumkhuhlane abangu-11 358, abangu-9 554 kubikwa sebasila kuthi abangu-309 basweleka.
Kusaziso esiphume kuKhabhinethi ngoLwesibili uMphathintambo wogatsha olubona ngezokuhanjiswa kwembiko uMonica Mutsvangwa uthe uHulumende esebenzelana lezinye ingatsha uqhubeka ngokuqinisa amasu okwenqabela ukumemetheka kweCovid-19 ezikolo ngesikhathi izikolo zilungiselela ukuvalwa.
UMphathintambo Mutsvangwa uthe ugatsha olubona ngezokuhambisa solujulise indlela olukhangela ngayo ukuphathwa kwalumsebenzi ukuze kulandelwe imilayo eyabekwayo.
Uthe inhlanganiso yeWorld Health Organisation (WHO) isikhiphe eminye njalo imilayo ukuze iphathise amazwe ekulawuleni lumkhuhlane.
UMphathintambo Mutsvangwa uthe iKhabhinethi inanzelele ngokusuthiseka ukuba ilizwe leZimbabwe lilandela imilayo le njalo lizaqhubeka likwenza lokhu.
Ukhuthaze uzulu ukuthi alandele imilayo yeCovid-19 ngokupheleleyo.
“Ikhabhinethi iyakuqonqosela ukuthi labo abangena kuleli bakhangelelwe ukuthi babelama Covid-19-free certificates athethwe kumahola angu-48 bengakasuki lapho abavela khona njalo ukuhlolwa kwabo kumele kube ngokwenziwa kukuzindlu zokusebenzela zabososayensi ezithenjiweyo,” kutsho uMutsvangwa.
Uthe izihambi ezingena elizweni zingela zithupha lezi zizaqala zivalelwe endaweni zokwehlukaniswa.
Online Reporter