admin
KULEZITHANDANI ezihlala kweleSouth Africa, uAnthony kanye loZandile Matiwaza-Denga eseziveze ukuthi zizanika abalimi abasakhulayo be-horticulture abasesabelweni seMatabeleland inhlanyelo yezilimo ezehlukeneyo ukuze zincedise uHulumende kuhlelo lwakhe lokuthuthukisa ezokulima elizweni.
Izithandani lezi ezilenkampani ebizwa ngokuthi yi-Africa Grain and Seeds Association, zizanika abalimi inhlanyelo ye-beetroot, khabitshi, imiqwente, ihanyanisi, i-butternut, amatamatisi kanye leyemibhida.
Kubikwa labo abazanikwa inhlanyelo bazakhethwa luhlangothi lweSocial Welfare ndawonye labe Agritex.
Kukhangelelwe njalo ukuthi kube lolunye uhlelo lokuthenga izilimo lezi oluzakhokhelwa yinkampani le, njengengxenye yomsebenzi wayo womphakathi.
Kuhlelo lolu kuhloswe amayunivesithi, amakolitshi, izikolo, labo abalima bethengisa kanye labalimi abancane.
Ezinye indawo ezizakuba yingxenye yohlelo lolu zigoqela i-Lupane State University eseLupane, Joshua Mqabuko Nkomo Polytechnic eGwanda, Falcon College eseSigodini, izikolo ezisezabelweni zeMatabeleland North kanye leSouth, ama-irrigation schemes aseGwanda, Bulilima, esigabeni seSigodini kanye labalimi bezilimo ezincwaba abakoMurehwa.
Online Reporter