Izikolo zeLupane ziphiwa izicoco

Cornelius Lupahla
BEKUNGABIZWA ozwayo ngoLwesihlanu kuviki ephelileyo esikolo se-Amandlethu Secondary School eLupane lapho obekulomkhosi wokupha abafundi abenza kuhle ezifundweni kanye lezemidlalo nyakenye izicoco.

UMqondisi wezemfundo eMatabeleland North, uNkosikazi Boithatelo Mnguni ubikele uMthunywa ukuthi emkhosini lo abafundi abenza kuhle kumihloliso yanyakenye baphiwe izipho njengendlela yokubakhuthaza emsebenzini wabo wesikolo.

“Izipho ziphiwe oGiredi 7, oFomu 4, kunye labo Fomu 6 abaphumelelayo emihlolisweni. Sinike njalo lalabo abaphila lobugoga izipho zokwenza kuhle futhi,” kulandisa uNkkz Mnguni.

UNkkz Mnguni uqhubeke wabika ukuthi izipho lezi beziphiwa njalo izikolo ezenza kuhle kwezemidlalo, kwezokuhlabelela kunye lakwezamasiko.

Kubikwa ezikolo zemfundo yaphezulu ezithole izicoco zigoqela iFatima High Shcool yona ethole imvuzo kuzifundo eziyisikhombisa, iMabhikwa yona ithole izicoco kuzifundo eziyisificaminwe mibili kwathi iRegina Mundi yathola imvuzo kuzifundo ezine. Kulezizikolo isikolo esitshengise ingqubelaphambili okwedlula ezinye kube yiRegina Mundi.

Izikolo zeSecondary ezithole imvuzo zigoqela iZe))nzele, Jotsholo, Zwangendaba, Nhlanhla, Amandlethu, Vulindlela, Sibambene leLupanda. Kulezizikolo isikolo esitshengise ingqubelaphambili kube yiLupanda Secondary School.

Kuzinga le-A-level iZwangendaba, Amandlethu, Mabhikwa leFatima zithole izicoco kuSiNdebele laku-zifundo zeMbali kwathi i-Amandlethu leMabhikwa zabuya zathola izicoco kuzifundo zebhayibhili.

Kuma-Primary Schools isikolo esibe lempumela ephakemeyo ezifundweni kube yiMatshakayile Primary School, kwathi ezenze kuhle kulezinye kube leMatshokotsha, Gomoza kunye leDaluka. Kuzozonke izikolo ze-Primary izikolo ezitshengise ingqubelaphambili kube yiKheswa, iMzola kunye leDaluka.

Kwezamasiko isikolo okubikwa sedlule ezinye kube yiNdlovu Primary School kwathi kwezokuhlabelela kwaba yiDandanda Primary leMabhikwa High School.

Kwezemidlalo isikolo esedlule ezinye ku-volleyball ebafaneni lemankazaneni kubikwa kube yiPhunyuka, ku-handball emankazaneni kwaba yiZwangendaba, kwathi kuma Under-17 ku-volleyball ebafaneni kwaba yiFatima.

Kuma Under-20 kunguqu yamantombazana isikolo esithole isicoco kube yiZwangendaba.

Kuzwakale ukuthi abafundi kunye lezikolo abenza kuhle kumnyaka ophelileyo bazangena kumncintiswano lezinye izabelo.