admin
Ophezulu Stinta – UMAVIS uselalo ithemba ukuthi lakanjani ngalo Mgqibelo wayezabuya. Bathi abadala imbeleko ayilahlwa ngokufelwa yilelo-ke ayeziduduza ngalo uMavis. Laphuza ukutshona lelanga leli nango wayengasakwazi ukuthi alinde ukusa lokhu, ayobonana loOscar wakhe. Walungisa isigqoko sakhe ayezasigqoka ngalowo Mgqibelo kwakukuhle ke ukuthi lalapha kwabo wayesaziwa njengomuntu oya emtshadweni yilo ayesezimisele ukucatsha ngalo leli.
Kwasa okungaliyo. Wavuka walungisela uMavis wageza wacicima. Wayezimisele ukuhamba ngetekisi ngoba yiyo eyayizamsiza ukubamba isikhathi sehola letshumi ekuseni. Masinyazana nje wayesese silindweni lapho okwakudlula amabhasi avele nje angawanaki. Lalawo matekisi ayevele ezidlulela egcwele phamu. Kwaze kwathi ngelikade wazithola esephakathi kwelinye lamatekisi wabona nje ukuthi isiqubu sayo hayi wayezafika ngesikhathi ukuyolinda uOscar wakhe.
Wehla esilindweni sesitimela kulemizuzu emihlanu kwedlule ihola letshumi. Lapho ke wayesethwele amaphaphu ngezandla uMavis ecabanga ukuthi uzathola uOscar eselinde waze wadela. Waya lapho okuma khona avela eNdwedwe. Abheke inkombalanga yakhe abuye njalo alaqaze kodwa lutho ukuthi amehlo akhe adibane loOscar.
Wabona kungcono ukubhoda bhoda lelodolobho lakhona wazibona esezafika ekucineni kwalo. Yena ithemba kwakuyikuthi wayezadibana lo Oscar ngengozi nje lapha edolobheni. Waze wabona kungcono ukuthi angene ngasesitolo esithengisa impahla kanye lezicathulo. Lapho inhliziyo yakhe yafutha okwamagama ekhumbula ukuthi isoka lakhe lalimthembise izicathulo. Wabuyela njalo njengakuqala kodwa phinde ambone uOscar. Lapho kwaphela isineke kwabalukhuni enhliziyweni yakhe wabona nje kungcono azibuyelele ekhaya.
Online Reporter