Online Reporter
Nkosilathi Sibanda loEthel Ncube
INDLELA zonke ziqonda emzini wenduna uDakamela, esigabeni seNkayi eMatabeleland North lapho okuzabe kulomcimbi wamasiko amaNdebele lokunikezwa kwezicoco kuzakhamizi eziqhuba inhlelo zengqubekela phambili kulindawo.
Umkhosi lo, obizwa ngokuthi “Imiklomelo kaChief Dakamela” uzaqhutshwa mhlaka 4 kusiya ku-5 Mabasa. Njengeminyaka yonke, kusukela ngo-2022, kuzabe kungasimuntu, kuvutha inkundla, amaNdebele egiya ngoludala kuvunulwe ezomdabu, kudliwa okwesiNtu.
Lonyaka, kubikwa kuza kubancane indawo ngoba abaqoqi bombuthano lo babika ukuthi bakhangelele ukuthi kubemnandi ukwedlula eminyakeni edluleyo.
Inhloso ngeyokubonga lokukhuthaza abantu abaqhuba inhlelo zengqubekela phambili esigabeni seNkayi kunye lokulondoloza amasiko.
Njengesitshengiselo sokukhula komkhosi lo, lonyaka kuzabe kukhuthazwa uzulu ukuthi afunde ukwethekelela emaphandleni. Ngokunjalo, kuzabe kule-Camping Village leChief Dakamela Bush Dinner.
Induna ibike ukuba imiklomelo iqakathekile ngoba ikhulisa isizwe njalo lentuthuko iyaqhubekela phambili.
“Ukupha abantu imiklomelo kuqakathekile kakhulu ngoba kubenza baqhubekele phambili kakhulu ngokusebenza gadalala bethuthukisa isizwe. Bengathola ukunanzwa ngemiklomelo ngesikhathi esizayo kubenza baphakamise izinga lokwenza okuhle.
“Kungakho sinxusa wonke umuntu ukuba aze azozibonela, abayabe bengatholanga imiklomela labo kubapha umlandu wokuyakwenza kuhle endaweni zabo beletha intuthuko,” kubika induna uDakamela, ikhuluma lentatheli.
Induna ibike ukuba ilokujabula ekuthini lonyaka banengi abantu abafuna ukwethekelela eNkayi.
“Lonyaka abantu asebebike ukuba bazabuya banengi kakhulu kungakho abantu bazahlala kuma-tents duzane lesikolo. Lapho abazabe behlala khona bazabe bevikelwe. Umuntu kuyamele abuye letende lakhe kunye lengubo zakhe. Umbono wokuhlala ematendeni yikuthi abantu bahlale ndawonye, bakholise ukuba sekhaya behlezi eceleni komlilo bebona inkanyezi,” kutsho induna uDakamela.
Kubikwa kuzakuba lebhasi ezathwala abantu abasuka koBulawayo njalo izaphenduka labo.
Umcebisi omkhulu wenduna uDakamela, uNtando Ndlovu kaMabasa, utshele iphephandaba likazulu ukuthi amalungiselelo asezingeni eliphezulu.
“Umkhosi walonyaka uzaqalisa ngoLwesihlanu lapho okuzaqhutshwa khona imisebenzi yesiNtu, ehlose ukukhuthaza lokufundisa umphakathi. Ntambama, izivakatshi zizakholisa emcimbini wezomculo wesiNtu. Sifuna ukutshengisa ubungcitshi bamasiko ethu esabelweni seMatabeleland North.
“Ngelanga elilandelayo, mhlaka 5 Mabasa, sizaqhuba umbuthano wokunikezwa kwezicoco lapho okuzabongwa, kuphakanyiswe labo abancedisa kungqubekela phambili lokulondoloza amasiko. Ebusuku, kuzadliwa kuChief Dakamela Bush Dinner, abantu bekholisa izibiliboco besemfuleni.
“Kunengi okuzasungulwa lonyaka, okuzajabulisa abantu. Umkhosi lo ugxile ekuphakamiseni uzulu, njalo umbono wenduna uDakamela ngowokuthi kuqakathekisa ubuntu, isiNtu lokuzigqaja kwabantu abaNsundu. Indikimba ngethi: IsiNtu yiBuntu Bethu,” kutsho uNdlovu.
Ugcizelele ukuthi umcimbi wenduna uDakamela wamukela bonke abantu hatshi abeNkayi kuphela.
“Abafuna ukuzokholisa kulumkhosi, ikakhulu kuCamping Village leBush Dinner abaxhumane lathi, bathole amatikiti.”
