Online Reporter
Nkosilathi Sibanda
UHLELO lwezemfundo oluphawulwe nguHulumende, olwe-Heritage Based Education 5.0, kumele lusekelwe yikusetshenziswa kwemitshina yokuxhumana yakulezinsuku ukuze abafundi bajulisise ulwazi lokubumba amacebo okuziphilisa lokwakha ilizwe.
Lokhu kuvezwe libhanga le-Peoples Own Savings Bank (POSB), ngesikhathi libika ngokuthi selizaphathisa izikolo ukuthi zithole ithuba lokuxhuma abafundi ku-intanethi, ngokusebenzisa amagagasi eStarlink.
IPOSB izaqhuba lokhu ibambene leTelOne, Transerve le-Global Solar.
Izikolo, ngokutsho kwebhanga leli, zizaphiwa zivunyelwe ukuthi zingene kusivumelwano sokubolekwa imali yokuphanyeka isigxingi seStarlink, ngenhloso yokuthi kunciphiswe ukusilela kwemitshina yokuxhumana lokutholakala kwemibiko ezigabeni.
Imitshina yakulezinsuku isekela kabanzi ezemfundo ezikolo zakuleli kulandelwa iSustainable Development Goal 4, eye-United Nations ngokwenza kubelula ukuthi kutholakale imfundo ebulenjini, kusetshenziswa i-Artificial Intelligence (AI), ukuvulwa kwemisebenzi lenhlalakahle.
Ibhanga lePOSB lithe lizimisele ukuba yingxenye yokuphakamisa izikolo, ikakhulu lezo ezisemaphandleni ngokwethula iStarlink credit facility le.
Umaqhuzu wePOSB, uMnumzana Garainashe Changunda, uthe inhloso yabo yikuthi kungabi lomuntu kumbe indawo esalela emuva, kusekelwa umbono kaHulumende oweVision 2030.
“Lokhu kungaphezu nje kokuboleka imali. Kuyatshintsha indlela esiphawula ngayo imfundo ezikolo. Sizimisele ukuncedisa izikolo, ikakhulukazi emaphandleni, ukuthi zithuthuke ngokufinyelela ku-intanethi okusezingeni eliphezulu. Kuyingxenye yokuzibophezela kwethu okubanzi kungqubekela phambili, ukulinganisa amathuba kwezemali kunye lokuncedisa kuVision 2030, lapho okukhangelelwe ukuthi izizalwane ziphile impilo engcono.
“Sabona ukuthi ukuvikeleka kwesibambiso kuvame ukuvimba ekufinyeleleni imali. Yikho sinikeza loluhlelo lokubolekwa kwemali ye-solar leStarlink kungela isibambiso, siqinisekisa ukuthi akulamuntu njalo akulandawo ezasalela emuva,” kutsho uMnu Changunda.
