adminKUBIKWA ngomnyaka ka1994 indodana ezelwe yodwa kaRebecca Mokoena uOupa yanyamalala yangabonakali kweleSouth Africa.
Kwathi ngemva kweminyaka elitshumi ngo2004 umkakhe wanyamalala njalo.
Kubikwa bavakatshela esinye isangoma sababikela ukuthi bathukwa ngomuthi obizwa ngokuthi yidukanezwe.
Isangoma lesi sabatshela ukuthi injongo yomuthi lowo ngowokuthi amadoda wonke omdeni anyamalale.
Khathesi badidekile ukuthi ngubani ozalandela.
“Ngomnyaka ka2014 sasisesaba yikho nje sasihlala njalonje silinde abantwabethu abancane. Asisathembi lutho ngoba asikwazi ukuthi ngubani owenza ulunya olungaka emulini yethu,” kutsho uOuma Mokoena (38).
“Siyahluthulela amasango ukuze abantwana bengaphumi phandle ikakhulu ngempelaviki. Siyabakhangela nxa bedlala phandle.”
URebecca uchaze ukuthi isangoma sabuya ukuzoqinisa umuzi wakhe ukuze abesilisa benganyamalali emulini yakhe.
Noma nje kunjalo kodwa ulokhe esesaba okungenzeka.
Okumdidayo kakhulu yikuthi ngesikhathi umkakhe lomntanakhe benyamalala babengahlanyi.
“Bengingazwisisa ngabe bebehlanya kumbe ngabe besixabene kodwa akukho lokukodwa kwakhona.”
URebecca uchaze ukuthi kalali ebusuku nxa engacabanga ngokunyamalala kwamalunga emuli yakhe.
“Kwesinye isikhathi ngibona umnyeni wami emaphutsheni noma nje uyabe ekhanya engathabanga. Ngicela lingithandazise.”
Isangoma uMadoda Mavhuthela uchaze ukuthi umuthi udukanezwe usetshenziswa zinyanga ezixhwalileyo ukululaza imideni yabanye abantu.
“Umuthi lo wenza abantu benyamalale kungela sizatho esibambekayo.” — Ubulembu
Online Reporter