adminMlandeli B P Dube
SiQalise ukucubungula inkondlo le kuviki ephelileyo. Lamuhla siyisusa lapho esaphetha khona ngeviki ephelileyo.
Sitshiye imbongi ididekile ngezenzo zentsha yalamuhla yona eyenza okuphambene lalokho okufiswa ngabezolo okunjengokuhlonipha wonke umuntu omdala njengomzali wakho. Iyadinga imbongi ukubona umehluko phakathi kwentsha lomhlobo omdala.
Imbongi ithi iphambene ingqondo ngokudiphazwe yikukhalipha kwensango. Lapha imbongi ingabe isitsho ukuthi intsha le izibona angani ihlakaniphile kanti iqhutshwa zinsango lezi abazibhema sagwayi lalo lingabalingananga.
Kayisabonisisi imbongi ngoba nxa ithi iyakhangela lelosango lokukhokhelwa ngabazi indlela limphice.
Kalisabonakali lelosango lokukhokhelwa ngabadala bona asebesazi okunengi ngempilo.
Impilo yakhathesi isiyehlukile kweyezolo. Ekadeni umntwana ubengowomuntu wonke, ubengokabani lobani. Lokhu kutsho ukuthi ekadeni umntwana ubethunywa ngubani lobani hatshi abazali bakhe kuphela. Njalo umntwana ubehlonipha wonke umuntu omdala hatshi abazali bakhe bodwa, kodwa lamuhla kuthiwa kasikabani umntwana.
Khathesi ungeze wamthuma umntwana ongasiwakho ngoba kakulaleli lokho. Labazali bakhe lowo mntwana bangakwenza kubi nxa bengezwa kuthiwa umthumile.
Akusekho ukuthi umntwana ubengokabani lobani. Bonke bayamlandula umntwana wakhathesi ngoba uselihlongandlebe njalo yena uthi ulandela isikhathesi kasaphili impilo yakudala. SekukoZibonele-mntanami usukhulile. Abasalayeki abantwana bakhathesi yikho nje sebezibona kungathi ngabantu asebekhulile. Esikuzwisisa lapha yikuthi abantwana bakhathesi sebegijimela izinto zabadala isikhathi sabo singakafiki. Ngenxa yokuthi abalaleli izixwayiso ezivela ebadaleni sebeyekelelwa okungathi ngamabele akhula lokhula. Abasalayeki.
Ithi izikhangela imbongi izibone ukuthi isikhulile ngoba nanko ithi inwele zimpunga isiyinjobo zesalukazi. Iyavuma ukuthi ukukhula kanje kuza lokunengi. Isibona izinto eyayingacabangi ukuthi kungafika isikhathi sokuthi izibone ngoba nansi intsha isiletha obekungaziwa izolo. Iyafisa imbongi ukuthi aluba umoya wobudala ungavutha lokwazi kufinyelele kuntsha ngoba umuntu omdala esebone okunengi. Nxa umuntu esebone okunengi kusobala ukuthi lolwazi ulalo.
Isimanga yikuthi lanxa esempunga, okutsho ukuthi usekhulile amazwi akhe kawasalalelwa ngoba nanku uthi akha phansi amazwi akhe. Sekunje lamhlanje kanti muvana nje elakhe ilizwi belingahlalwa ngamazolo okutsho ukuthi izolo elakhe ilizwi belilalelwa. Ubekhuluma kuzwakale kwenziwe lokho akutshoyo. Intsha kuthiwa isiyizitimela emlonyeni okutsho ukuthi intsha isikhuluma kakhulu njalo ikhuluma izinto ezilihlazo. Kuthiwa okuphuma emlonyeni yentsha yimbabazane yona ehaqaza umzimba ulume.
Kusobala ukuthi intsha leyo isikhuluma amagama amabi angahloniphiyo asebekhulile. Kubi lokho okukhulunywa yintsha ngoba kutshwaqisa umzimba. Into etshwaqisa umzimba ngembi njalo eyethusa umzimba ngoba ingafanelanga. Nxa intsha ikhuluma izibozi lezi umuntu omdala, owezolo uzonda kakhulu abemafindofindo.
Online Reporter