Online Reporter
YiNtatheli kaMthunywa
IKHANSILI ebona ngokulotshwa kwemihloliso kuleli eyeZimbabwe School Examination Council isiveze ukuthi ilanga lokucina lokubhadalela ukubhala imihloliso ye-Ordinary le Advanced Level yomnyaka ka-2026 ngumhlaka 27 Mbimbitho.
Isikhulumi sogatsha lwezemfundo uMnumzana Taungana Ndoro ubike ukuba zonke izikolo lezindawo lapho okuzabhalelwa khona imihloliso kumele zisebenzise inkundla yebulenjini ukubhalisa ukubhala imihloliso.
“Abakhokheli bezikolo balomlandu wokubona ukuba bathumela imininingwane eqondileyo yabafundi.
Akulampumela yemihloliso ezaphiwa umfundi owehluleke ukubhala imihloliso yonke yesifundo esithile,” kutsho uMnu Ndoro.
Uqhubekele phambili eveza ukuba zonke izikolo kumbe indawo lapho okuzabhalelwa khona imihloliso kumele indawo kumbe isikolo sibe labafundi abalitshumi ku O-level laku A-level. Kuthi labo ababhala bengasi bafundi bakuleyondawo kumele babe lezithupha, i-passport kumbe incwadi yokuzalwa (i-birth certificate).
“Abafundi abalezinye indingeko kumele imininingwane yabo ifakwe ngendlela eqondileyo njalo ihlolisiswe ukuba iqondile ingakahanjiswa.
UMnu Ndoro ubuye njalo waqonqonsela ukuba izikolo zingaze zabhalisa abafundi abafundayo njengama-private candidate.
“Izikolo zekele ukwephula umthetho ngokubhalisa abafundi babenze ama-private candidate ngenhloso yokuthi impumela yemihloliso ingavezi iqiniso ngesikolo. Ukwenza njalo yikwephula umthetho wemihloliso njalo kuletha impumela emibi,” kutsho uNdoro.
