Online Reporter
Ethel Ncube
ABALIMI abalendawo ezincane sebexwayiswe ukuthi bangafuya izimvu bazitholele inzuzo emangalisayo.
UNkosazana Sandra Ndlovu onguAgricultural Extension Officer koBulawayo usekhuthaze abalimi ukuthi bafuye izimvu ngoba zilenzuzo emangalisayo.
“Izimvu zifuna ukuhlaliswa endaweni elomthunzi, kazifuni langa njalo sikhuthaza abalimi ukuthi bezihlalise endaweni eyakhiweyo efakwe lophahla ukuze kube lomthunzi.
“Endaweni yakhona kumele kube kungena umoya kuhle ukuze izimvu zingacini sezihlatshwa yimikhuhlane.
“Ukuzihlalisa endaweni evikelekileyo kwenza umumo womkhathi otshiyeneyo ungaziphambanisi futhi lenyamazana zeganga zingazihlaseli,” kutsho uNkszn Ndlovu.
Uqhubekele phambili esithi lapho okuhlala khona izimvu kumele kuhlale komile.
“Sikhuthaza abalimi ukuthi bendlalele izimvu zabo utshani obomileyo ukwenzela ukuthi zihlale zikhudumala njalo zingangenwa ngumqando ovela phansi. Abalimi kumele babone ukuthi lapho okuhlala khona izimvu zabo kuhlala kuhlanzekile,” kutsho uNkszn Ndlovu.
Uthe ukhuthaza abalimi ukuthi bevale lapho okuhlala khona izimvu zabo ngocingo.
“Sikhuthaza abalimi ukuthi bevalele izimvu zabo ngocingo ukuze zingabaleki njalo zingangenelwa ngamaganayana.
“Okunye njalo sikhuthaza abalimi ukuthi behlukanise phakathi lapho abahlalisa khona izimvu befake lendawo abazabe beziphela khona ukudla,” kuphetha uNkszn Ndlovu.
