admin
YiNtatheli kaMthunywa
UZULU usekhuthazwe ukuba aqaphele amasela njalo lapho esakha imduli yama-durawall akhe ngendlela ezenza omakhelwane benelise ukubona okwenzakalayo egumeni.
Ekhuluma lentatheli kaMthunywa uProvincial Community Liason Officer CID, uDetective Inspector Portia Dadirai Chino esembukisweni weZimbabwe International Trade Fair uthe ama-durawall kumele akhiwe ngendlela ezenza omakhelwane benelise ukubona okwenzakalayo.
“Uzulu kumele aqaphele amasela ngakho lonyaka sixwayisa umphakathi ukuthi nxa esakha ama-durawal awakhe ngendlela ezenza omakhelwane labo benelise ukubona okwenzakalayo egumeni ukuze benelise ukuphathisa nxa bengabona umuntu abangamaziyo balimukise lomakhelwane wabo kungakabi lomonakalo.
“Sesinanzelele ukuthi amacala amanengi adalwa ezindlini lapho okulemduli emide yingakho lonyaka sibukisa le imihlobo yemiduli. Okunye njalo izindlu kumele zibe lama-burglar bars,” kuchaza uDet Insp Chino.
“Phansi sikhuthaza abantu ukuthi bafake ukhethe ngoba lona luhle ngokuthi loba umuntu angaze azame ukunyonyobba kuyezwakala ukuthi kulomuntu ohambayo egumeni okwenza abasendlini bahle balimuke.
Uthe amasela angagqekeza futhi, abantu bangabambi lutho amapholisa aze afike azohlolisisa ngoba yiyo indlela yokuthola ubufakazi kanye lokuthi benelise ukubamba amasela.
Uphethe ngokuxwayisa njalo ukuthi omakhelwane bangabona amasela bangaze bawalanda kodwa kumele benze imizamo yokwazisa amapholisa kunye labanye omakhelwane ukuze babe banengi.
“Uzulu kumele ahlale elenombolo zamapholisa kunye lezabomakhelwane. Uzulu nxa esola ukuthi kungabe kugqekezwa emzini wakhe loba komakhelwane kumele aphange azise amapholisa loba omakhelwane ukuze leyo muli ehlaselweyo ithole usizo masinyane,” kuphetha uDet Insp Chinho.
Online Reporter