admin
YiNtatheli kaMthunywa
KULISIZINI iTsholotsho ingavunyelwa ukuthi yethusele njengeqembu elikhulu nxa ihlangana lamathimu aqabuka ukudlala kuligi ephakemeyo eyeCastle.
Lakanye zizethusela Iziqholo zeZhwane zidlala leNgezi Platinum enkundleni yeWhite City ngoMgqibelo. Iqembu leTsholotsho akuthandabuzwa ukuthi seliguquke ngokudlala kuhle elikwenzayo kulezinsuku nanko kungenzeka kubelula ukuthi lidlule lihwitha phezulu kweNgezi Platinum.
ITsholotsho inxusa izimbamgodi ezichinsa iligi yePSL kumdlalo ozahlabusa ngoba amaqembu womabili ayethuselana kulisizini.
Ukaputeni weTsholotsho uWilliam Stima uthe ukudlalela egumeni abalijwayeleyo kuzenza kubelula ukuthi batshengise iNgezi Platinum ukuthi ibhola lidlalwa njani.
“Sizabatshengisa ukuthi iTsholotsho FC isifike yahlala yachelesa kuPSL. Njengoba sidlalela enkundleni yeWhite City, sizakhweza ukuzethemba kwethu ebesilakho kumidlalo emine edluleyo.
“Asikufaki ekhanda ukuthi iNgezi (Platinum) yithimu evela kuDivision One ngoba lathi saphuma khona.
Amalungiselelo ethu alumdlalo afana lokuthi sidibana lethimu enkulu,” kutsho uStima ngemva kokulolonga enkundleni yeWhite City ngoLwesithathu.
“Umdlalo wethu usujiya, okutsho ukuthi nxa sisiyafika kusibanga semidlalo elitshumi sizabonisa ukuthi akulathimu ezalunga nxa idlala lathi.”
Umqeqetshi weTsholotsho uLizwe Sweswe uthe: “Sithe singena kuliligi le sathembisa abalandeli bethu ukuthi asisoke siphume.
“Abadlali sebezimisele ukuthi bebambe ziqine,” nguSweswe lo.
Umqeqetshi lo uthe loba belokuthaba ngokudlala abakwenzayo kulezinsuku, bayazi ukuthi ukudlala kuPSL akufuni amawala lokuzigqaja.
Imidlalo yeCastle PSL:
NgoMgqibelo: Chicken Inn v Bulawayo City (Luveve), Tsholotsho v Ngezi Platinum (White City), FC Platinum v Harare City (Mandava),
NgeSonto: Highlanders v Chapungu (Barbourfields), Hwange v Dynamos (Colliery), Triangle v ZPC Kariba (Gibbo), CAPS United v Border Strikers (National Sports Stadium), Mutare City Rovers v How Mine (Sakubva).
Online Reporter