admin
UCARLOS Tevez usevikele isinqumo sikaLionel Messi sokuthatha umhlalaphansi ekumeleni ilizwe lakhe kumncintiswano yonke ebholeni likanobhutshuzwayo.
UMessi loTevez bonke badabuka eArgentina.
UTevez uqhube ngokuthi inyathelo likaMessi kungenzeka ukuthi lilandelwe ngabanye abadlali bakulelo lizwe ngenxa yokuthi inhlanganiso ebambe inhlelo kunguqu yeArgentina ayimanga kahle.
Kumbiko ephume ebulenjini kuliviki, uTevez uthe akulamuntu olelungelo lokuthi asole isinqumo sikaMessi.
“Okwenziwe nguMessi ngivumelana lakho. Izinto azimanga kuhle kubhola leArgentina. Nxa uMessi ekhethe ukutshiya ukumela isizwe, akahlonitshwe ngoba wenze akubone kuqakathekile kuye,” kutsho uTevez.
UTevez, oseke wadlalela i-Argentina okwamahlandla angamatshumi ayisikhombisa uthe inhlanganiso yenguqu eArgentina ilesandla esinqumeni sikaMessi.
“Kunengi okungahambi kahle kunhlanganiso ye-Argentina Football Association,” kutsho uTevez etshela intatheli zeTYC Sports.
“Abadlali bayazimisela ukuthi batshiye okuqakathekileyo empilweni zabo bayedlalela isizwe, kodwa nanko inhlanganiso yeAFA ayilandaba labo.
“UMessi usekhathele njalo angimsoli ngoba lami ngake ngadlula kikho.”
UMessi, oleminyaka yokuzalwa engu- 29, uphume emphakathini ngenyanga edluleyo ememezela ukuthi usecabange ukuma ukudlalela isizwe sakubo kuyo yonke imncintiswano. Lokhu kweza kulandela ukukhutha kwakhe umbekwa mhla iArgentina idlala leChile kumdlalo weCopa America.
Umdlali lo ogijima kuBarcelona waveza ukuthi “usekhathele” ngokudlalela iqembu lesizwe ngoba kuyacaca ukuthi akadalelwanga ukudlalela lona.
UMessi wahlohla amabhola angu-55 emidlalweni engu-113 emele iArgentina. — Ubulembu
Online Reporter