Izithandani zizajayiva e-Acaja

Ethel Ncube

AKUBIZWA ozwayo ngoMgqibelo ozayo eAcaja lapho okuzabe kugidwa, kukholiswa kunanzwa iValentine’s Day.
Umcimbi lo uzabe umhlaka 15 Nhlolanja lapho izithandani ezizabe zilande ukuzojayiva lokwenza imidlalo etshiyeneyo.

Ekhuluma lentatheli umqondisi we-Acaja uAbednico Ncube ubike ukuba konke sokumi ngomumo oqondileyo,
“Yonke into ihamba kuhle e-Acaja, simelele kuphela ilanga ukuthi izithandani zibuye zizotshona zigida ziwosa lathi, zijabulela uthando. Endaweni le silemidlalo njalo etshiyeneyo ebalisa ukubhukutsha, ama-darts, volleyball, tennis ball, moon walk leminye imidlalo etshiyeneyo. Lapha sinxusa zonke izithandani.

“Ukubiza izithandani ukuthi zizojayiva lapha sizama ukuqinisa uthando ezimulini, sisithi uthando kalukhule ukuze indaba zokwehlukana zehle. Siqinisa ukuthi abantu bathandane njalo babelokubekezela,” kubika uNcube.
Uqhubekele phambili eveza ukuthi kuzakuba lokufundisana thize.

“Sizathola isikhathi kusukela ngehola lesine emini kusiya kwelesihlanu, sixoxisana lezithandani labo bebuza abafuna ukukubuza. Ngesikhathi kuxoxiswana lapha abantu bazakhuluma abafuna kulungiswe kundaba zabo zothando. Wonke umuntu uyabe ekhululekile lapha.

“Ekucineni silemvuzo esiyipha izithandani ama-chocolates, izikipa, iziwiji lokunye okunengi okutshiyeneyo. Siyalinxusa endaweni ezitshiyeneyo ukuba libuye ngobunengi benu lizokholisa lathi. Lingakhohlwa silemidududu liyenelisa ukuyigada lisiyabuka idamu lesithandwa sakho.”