admin
Desire nkololo waBhanda
Tjebukani wake alimwana waNtibugwa pasi kwentunhu waMankolo, waka engina kwele kuDombodema, wake ebhudilila muzwidiyo zwizwe.
Ndaka tongo gala naye kwempfunu ndibhuzwa mawoloto awe ndikawana enamangwana akanaka kwazo. Wakati endilondolesedzela mawoloto ekati gole kuhhugwa buwongelo kwakaTemateme onowobhatsha kana unohakabe nlapi. Ndakazwibona ndobhayiwa njekiseni nomwana wontunhu wangu.
Kwakati kuli zwita nehhuba lebupelo mugole, katumwa kuTjemahale endisa kwama, wakabhuda lagala labe kuma tewuko, waka tsamba akasima akalinga kuTjemahale.
Milidzo yakabhata kwenyeza hule kukwe, bayisana bakabona budzwaratswara gwaTjebukani bekati pamwe swiyo kwabe mhandala, koga mwana unobvumiwa nenyemba dzekuDombodema, iye utji luhaba. Wakanopinda kaMposela kwagala kwabe hhalima.
Wakabe etsamba akasima atjilinga kaKhame, Yake yakabhata vongofongo yakaKhame yetjinga yakapaladzila babvana mizi. Waka sedzela pazwitolo eti pamwe swiyo engawana nhu ungabhatisana naye zila. Gwake gwa swin’wa gututuma, mikabo yakapuhikana koga yose.
Bayisana bakawila Tjebukani senhuzi dzabona nkaka, waka manikana mwana waNtibugwa ekumbula hule kwaabva kwabe kule kule ngono mbeli kwaanonda atokuzibisisa kuti kwasala nhambo dzingapani.
Etjimile kwaka swika umwe nhutana wakabe enda ne mota. Wakati wakalinga kaWhoki, kuTjemahale kumuzila iye, wakahhula mota eti ngaagale ewunlinde utjatenga zwimwenyana.
Saziba kopindafa, Tjebukani wake atjiwan’wa ne tsamwina, gotjambila, bhitipiti lemalipiti.
Bhitipiti lakabva lazwibonela nkadzi, lakawutengela zwinon’wiwa bekabhuda batjilinga kuTjemahale. Belimuzila mweni wake ezwihakila tjanana tjakaMankolo koga Tjebukani kalamba nelinoti ndimwana wenyu, nditodlana antoziba zwamunoleba.
Nlume wakapinda naTjebukani kayenda naye kaWhoki ntome kwaManzamnyama, wakangina mutolo katengela Tjebukani inotonhola kakale. Wakayidila miti yetjikhuwa ino laladzisa.
Tjebukani wakayikakayila esingabone nlandu wose, wakatanga hhibayila hangwana yose oleba zwïsingawhakale, tsamwina lakabva lawunkakatila munzi walo likanolala naye, Bumhandala gwa Tjebukani gwakapelela papo. Eke woloto lebu dokotela, ngwele ne mimba-ke?
Lakamila hhuba, limila ndili muzila, lamila ndili mugwendo, iko ndowonoswika lini ka basekulu?
Bayisana banolidza milidzo, milidzo kule kule Bazwadzi mulinge bana, lemangwana lebana limumaboko enyu.
Ndoyemulila baKalanga bose goledzwa lakayengemala, Tjikalanga ngatjipfumbile
Kalanga Language and Cultural Development Association [email protected] +263 772 610 726
Online Reporter