Online Reporter
Wiseman Sibanda [email protected]
Baphorofiti nebadiyi bewhi ibanhu banabugalo gupehhugwi mubutjilo gwebanhu baMwali. Banolebelekela Mwali begala pakati kwebanhu. Banondisa nezwikumbilo zwebanhu kunayiye wakababumba. Nantolo bagala baka belipo baphorofiti, kubvila kunaMose kudombo leSinai. Nasi tobabona mumathelevizhini nemumalenje ezanila bhora. Ngono mbhuzo uyapo ndewunoti “NdebeNdzimu kene?”
Nelubaka gweNdebombuya, gunya nebulebeswa gwemphorofiti gwake gusingabve mufumwa yaanayo. Bulebeswa gugwe gwake gubon’wa nezila yaanozwitebamisa nayo kusi kweNdzimu. Kakale bakabehaliwa naMwali, besingazwihhodze ibo. Ukalinga baphorofiti banonga boJeremiya bakadanigwa kun’hingo weNdzimu besanhu bekazwagwa.
Baphorofiti bahhulo baka beti bebona zwakayipa zwinotiwa nebanhu zwinopalalana neda kwaMwali bekatjemela. Baka betjemela kene yani, kuhanganyila nabohe baka beta zwakayipa saboNebuchadnezzar. Mphorofiti unoyi Amos wakasola bakafuma baka betshambidzila pasi bahayi. Tobona kose naNatani etjemela He Davida hule kwebulayisa Yuriya ngobe ehaka nkadzikulu uwe Bhatjebha.
Mulukwalo gose gweNdebombuya akuna nekwatinowha kuyi ben’ha wakaIzirayeli bakalipa kuti badze babone baphorofiti. Baphorofiti banonga boElija bakazwipila hhisa lebeswa nebusupi kubanhu kuti babone kuti Ndzimu uyapo. Kose ikoku bakakuthama beziba kuti bengathubugwa ntshibha kene lini zwako. Akuna nelin’ompela hhuba kwabakadusisa banhu mari kuti bawhe zwinodiwa neNdzimu.
Masimba negunya lebaphorofiti bahhulo lake libva kunaMwali, lake lisingabve kubali, kufumwa yabo kene kumabunga edzitshipi. Kakale tobabona besibanhu banokubunganya fumwa bebva bezwimilidza nayo, beyihingisa kuti banhu bababone sabomwali behango. Johane Mbvubiki wakabe edla mhaho nebutji. Ngono banasi banohaka bon’wa nehango bedla zodliwa zwingalipila mwana mari yekwele kwegole lose.
Nayiye Nkololo waMwali, Yesu Kristu nekukwe wakati mhungubgwe dzinamimwina, nenyunywana dzinazwihaka koga iye aana nekwaangasumbika n’holo. Yesu wakabe ehandula umwe nlumetate waka ati “Ndokutobela kene poni kwawunoyenda”. Ikoku Yesu wakabe ekuleba eti unotobela iye asilingilile wana fumwa yehango ngobe iye nekukwe esina nayiyo n’umba yegala.
Ngono mumahhuba anasi luhaya gwetafuna ne amwe meno. Awungatjazibe kene baphorofiti banoleba zwaMwali kene bamubhizinesi zwabo lotengesa whi leNdzimu. Bamwe towha kuyi kudze ubabone notanga wadusa bungana. Kukayi banoti izila yeboka kene dzwala mbewu yeleta mhahha kuna banohaka babona. Kubva kuti gwabo lubhatsho gohha nemari sen’anga dzetjibanhu.
Towha kakale kuyi bamwe banobudziwa kuti bahhise mali yose yen’holo wemwedzi. Ngono atizi kuti unobe andisa yeyo mari n’ha unosala udlani munawhoyo mwedzi. Pamwe swiyo banosala bakaguta ilo dama leNdzimu. Kukayi bamwe bakabudziwa kuti batengese mizi yabo, mari yabawana mutengesa bayipe mphorofiti wabo nekuti gwabo bugalo gukudzimu. Tjinotjenamisa whuti iwhoyo mphorofiti uwe nzi unobe ulipo.
Banosola zwiyeto zwebamwe baphorofiti banota ikoku bekati kubva kuti dama leNdzimu lewan’wa nebanokwanisa lipa koga. Kana nebunji bazwagwa beAfrika banotjila mubuhayi, kubva kuti sethama kwebaphorofiti nekudzimu banongina zwakalema yezo kudze bawhe dama leNdzimu kwakafanela bangine muzwikwama. Ngono saku zwikwama nebunji zwakapubuka, dama leNdzimu banoyizela besaliwha.
Mubuhayi gose igogo nokowana baphorofiti banohha kakale balibatungamili bemakubungano edzitshipi benda nedzimota dzinodana, betenga nedzinyunywana dzetshipi beyizela muwawetela anodana. Uwha beti fuma kwabo tjilakidzo tjekuti bakahaliwa bekahhodzewa naMwali. Ngono kana naDivasi wakabe alimfumi koga wakandopelela kugehena.
Batumwa naMwali bakatebama, banosumikila zwinohakiwa neNdzimu, kusi zwinohaka hanhisa banhu. Yesu Kristu wakadiya wana be elapa esingalipise banhu. Wakahha ekalaya eti “Mapiwa musalipa, namwibo ipani musalipisa.’
