admin
Milcah Nhakura
MUDZIMAI wemuHarare anoti ari kugara akabatira hana yake mumawoko achitya murume wemunhu uyo waari kugara naye seshamwarirume yake sezvo achiti akamboda kumupisira mumba achishandisa chitofu chegasi.
Mukadzi uyu ari kuti haachada nezvemurume uyu, nekudaro anoda kuti achidzokera kumudzimai wake.
Zvisinei, murume uyu saimba uyu ari kutsika madziro achiti hazviite kuti abve ku‘‘small house” yake uku nechikonzero chekuti ndiye anobhadhara mari yerendi nekutenga chikafu.
Fatima Takura akamhan’arira Forward Mazuru kudare reHarare Civil Court achida gwaro rinomudzivirira.
Takura anoti rimwe zuva, Mazuru akavhura tangi regasi akapotsa amupisira mumba izvo zvaanoti nanhasi achiri kunzwa hana yake kutya.
“Changamire, ndinokumbirawo gwaro redziviriro kubva kumurume wandaimbodanana naye. Ndokumbirawo kuti adzokere kumudzimai wake nekuti ini ndamutadza. Anondirova nekundituka.
“Anoparadzazve midziyo yangu, akambouya akatora magumbeze angu ose ndokuvhura gas tank achida kundipisira mumba. Anondifonera achipopota zvekuti ndave kutotya kudaira nhare yake. Tine vana vaviri tose asi hazvina hazvo mhosva, vana ndinochengeta,” anodaro.
Mazuru anoti Takura haangamudzinge paimba yaari kubhadhara rendi nekutenga zvekudya.
“Mukadzi uyu haangandidzinge pamba pandiri kutenga zvekudya nekubhadhara rendi. Tanga tisati tanyatsosiyana asi ndazviona kuti haachadi nezvangu, ndinodzokera zvangu kumudzimai wangu,” anodaro.
Mutongi Tafadzwa Miti akapa Takura gwaro redziviriro.
Online Reporter