admin
Charity Moyo.
NGOLWESIHLANU kuviki ephelileyo bekungabizwa ozwayo eCity Hall koBulawayo kunanzwa usuku lwalabo abaphila lobugoga.
Umkhosi lo uqhutshwe ngaphansi kwendikimba ethi, “Empowering the Disabled” okutsho ukuthi ukuphakamisa labo abaphila lobugoga.
Uzulu obethe gwaqa kulumkhosi ufundiswe okunengi ngokuhlonipha amalungelo abo kanye lokubanakekela.
Ekhuluma kulumkhosi uMinister of State for Provincial Affairs koBulawayo, uKhomuredi Eunice Nomthandazo Moyo uthe akumelanga abantu abaphila lobugoga bakhangelelwe phansi ngoba labo bayafana labanye.
Ubuye waveza ukuthi abantu kumele babambane njalo bahloniphane ukuze kubelokuthula elizweni.
“Kasekeleni ukuhlukumeza kanye lokweyisa abantu abaphila lobugoga, ilizwe alingeke laba lilizwe nxa bona bengekho.
“Ngokunjalo kasibambaneni labo sibaphathise lapho abadinga khona ukusizwa, singenzenje ilizwe lizakuba lengqubekela phambili,” kutsho uKhmrd Moyo.
Umhlonitshwa uBrigadier-General uDokotela Felix Muchemwa onguye ongumgcinisihlalo webhodi yalabo abaphila lobugoga uthe akumelanga abantu beyise labo abagcina abantu abaphila lobugoga ngoba kabazikhethelanga ukuthi babe zingxenye zemuli zabo.
Wengezelele wathi uHulumende kumele aphathise labo abaphila lobugoga ukuze bafundiswe imisebenzi ehlukeneyo ukuze benelise ukuziphilisa.
“Sithanda ukubonga uHulumende wakithi ngokuphathisa okukhulu akwenzayo, nxa sikhangela umuzi weJairos Jiri lapho okugcinwa khona abantu abaphila lobugoga sithi kaqhubeke ngomsebenzi omuhle awenzayo,” kutsho uBrigadier General Dkt Muchemwa.
Online Reporter