Online Reporter
Innocent Kurira
ABATHANDA ukusebenzisa imihlobo yemithi yokukhokhela kabasoke balugxobe eWhite City kulimpelaviki, kubika inhlanganiso yeNational Athletics Association of Zimbabwe (Naaz).
Inhlanganiso le igcizelele ukuthi labo asebejwayele ukuncintisa benathile kumbe bethethe imithi yokukhokhela, bazayifunda ivaliwe kumqhudelwano wemidlalo yokugijima owe-2025 Junior Championships.
Lokhu kuza ngemva kokuthi sekwande abantu ababanjwa belezidakamizwa emzimbeni abaphatheka kumincintiswano yokugijima elizweni lakweminye imincintiswano eqhutshwa phandle kwelizwe. Ukusetshenziswa kwemithi yokukhokhela emincintiswaneni sekudale ukuthi kuphakanyiswe intshantshu zamanga, kuqilwe labo abancintisa ngeqiniso.
Ngokunjalo, iNaaz ithe izazama ngazo zonke indlela ukuvikela abagijimayo abasakhulayo abazancintisa eWhite City ngoMgqibelo. Lokhu kuqinisekiswe ngunobhala jikelele weNaaz uCynthia Phiri, ngesikhathi etshela i-Zimpapers Sports Hub ngamalungiselelo omncintiswano.
UPhiri ugcizelele ukuthi ubuqotho kunye lokuncintisana kuhle kumele kube yikho okuzaba ngumgogodla walumqhudelwano. Uthe ekupheleni komncintiswano kuzakhethwa iqembu elizamela ilizwe kumidlalo ye-African Union Sports Council Region 5 Youth Games ezaqhutshwa ngoNtulikazi, kweleNamibia.
Kunengi okukhangelelweyo, njalo umlayezo kaPhiri ucace ngokufanayo, ukuthi: eqenjini lelizwe kuzakhethwa labo abazancintisa kakuhle, ngokuhlanzeka, kungelakuqila.
“Isikipa seqembu lelizwe sizagqokwa yilabo abazancintisa, banqobe ngendlela ehlanzekileyo. Kasifuni labo abathatha imithi yokukhokhela. Kumele sivikele abantwabethu abazintshantshu.
“Kasilungiseleli abagijimayo abasakhulayo ukuthi baye kuma Region 5 Games eNamibia, kodwa sibumba ingcitshi zakusasa kuleli,” kutsho uPhiri.
