adminCornelius Luphahla
IZAKHAMIZI zesigabeni seMbalabala kuWadi 20 zikhala ngokuvalwa kwesikolo semisebenzi yezandla ebesiphathisa ontanga abaqeda isikolo.
Kuzwakale ukuthi iCraft Centre le eseMbalabala isiligalaji lezimota.
Kubikwa ontanga babefundela imisebenzi yezandla egoqela ukuthunga kanye lokubaza.
UMthunywa ukhulumisane lesinye isakhamuzi sakule indawo esithande ukubizwa ngokuthi nguNdlovu sachaza ukuthi abantwana abanengi esigabeni kabasebenzi.
“Inengi labantwana balapha abasebenzi abanye batholakala bethengisa umumbu lamatamatisi emgwaqweni kanye lezitolo kodwa kabatholi imali enengi.
“Ukungasebenzi kwabantwabethu laba sekubangela ukuthi amanye amantombazana acine ethengisa imizimba njengoba sisendaweni ephahlwe yimigwaqo emikhulu; oya eBeitbridge kanye loya eMasvingo,” kulandisa uMnu Ndlovu.
Uqhubekele phambili wathi abafana bona bacina besiba ngomakorokoza kukanti abanye bacina besiba ngamasela.
Intatheli ikhulume njalo lomunye umfundi owaphatheka kule iCraft Centre ongathandanga ukubethwa ngegama uthe kulomunye umkhokheli owathatha imitshina ababeyisebenzisa engabatshelanga.
“Indawo le sazakhela sodwa kodwa khathesi sokuthiwa yathengwa ngomunye umuntu esingamaziyo.
Sekulungiswa izimota njalo kuthengiswa lokudla.
Usobhuku wakule indawo uMnumzana Richard Ncube uthe sekunzima ukuthi abatsha bayefunda kuCraft Centre le ngoba sebangenwa yikutsheketsha.
“Abantwana bakule indawo ikakhulu abafana sebangenwa yikutsheketsha ngakho ngeke senelise ukubafundisa ngenkani, ngikhuluma nje inengi labo lingomakorokoza,” kutsho uMnu Ncube.
UMthunywa wenelise njalo ukukhulumisana loKhansila Nqabeni Nkala ecingweni wachaza ukuthi okwenza isikolo lesi savalwa yikuthi abantwana ababefunda kiso babengasaphatheki.
“I-Craft Centre le kayivalwanga kodwa kwaswelakala ababengaphatheka lapha ngoba kwasokusele abantwana abathathu ababelokhu befunda.
“Lokhu kwakutshengisa ukuthi abalamfutho wokwenza lokhu yikho nje yaze yavalwa.
“Eminye imitshina yokuthunga sayiboleka iMbalabala Secondary School njengoba nje singakayakhi isikolo lathi abantwabethu bafunda khona.
“Eminye njalo imitshina igciniwe yisigaba ngakho-ke nxa kungaba labantwana abalesifiso sokusebenza ngaphansi kwale iCraft Centre sizayithatha imitshina le bazisebenzisele,” kuchaza ukhansila Nkala.
UKhansila uphethe ngokulandula ukuthi kulentsha ethengisa koSokusile wathi kuthengisa abantu abadala kuphela.
Online Reporter