admin
Samkelo Tshuma
INGOMA zabaculi bakoBulawayo azilalelwa njalo aziladumo ngoba abantu bakuleli bathanda kakhulu umculo ophekwa kwamanye amazwe.
Abaculi bakulelidolobho sebehlala bekhala ngokungasekelwa lokuthi ingoma zabo azitshaywa kuwayilesi.
Umqondisi wabahlabeleli bakoBulawayo uKhulekani ‘‘Khuxman’’ Bethule, uthe imbangela yalokhu yikuba umculo wakoBulawayo kawaziwa kuleli.
UKhuxman uthe imbangela yokungaziwa komculo wabahlabeleli bakoBulawayo yikuthi abahlabeleli laba kabalamali yokucindezela amadlalade abo njalo umculo wabo kawudlalwa kumabonakude lakurediyo.
Uthe ukuswelakala kwemali yikho njalo okwenza kubenzima ukuthi abaculi laba beqoqe amadili lama-concert.
“Abantu abazi lutho ngomculo wakoNtuthu ngoba umhlabeleli engakhipha idlalade lakhe liphelela kustudiyo njalo abalaleli kabazitholi ingoma zabo.
“Okunye njalo abaculi laba badinga ukwaziwa ebulenjini kuphela kodwa esikhathini esinengi abantu abangaba xhasa kabakho kulezindawo,” kuchaza uKhuxman.
UKhuxxman ubuye walandisa ukuba abaculi abanengi basukile kwelakithi bayacula kwezinye indawo baphumelela ngoba ingoma zabo zingalalelwa zithakazelelwa kakhulu kulawo mazwe.
“Abanye abaculi baze batshiya ukucula bayenza eminye imisebenzi efana leyokufundisa kumbe ukuba ngumlimi.
Umhlabeleli wakuleli uLovemore Majaivana watshiya ukucula waya emazweni ngoba umculo wakhe ungananzwa.
“Bakhona abaculi asebesukile kule indawo bayahlabela kwezinye indawo ezinjeBotswana leSouth Africa.
Abaculi abafana labo Skaiva labo Calvin Nhliziyo obizwa ngokuthi Cal_Vin bafika baphumelela kwele South Africa, ingoma zabo zatshaywa emsakazweni khonale omunye wabo wathola ithuba lokucula lo Casper Nyovest onguye umculi odumileyo kulezi nsuku,” kutsho uKhuxman.
Online Reporter