admin
YiNtatheli kaMthunywa
ITSHOLOTSHO FC lonyaka izadlala sengathi ayidlanga nkotshane ngoba ihlose ukudlalela phezulu kwengalane yeligi yeCastle PSL, kutsho uLizwe Sweswe.
USweswe ukhulume kanje ngesikhathi ebikela uMthunywa ukuthi usekhethe abadlali bakhe abangamatshumi amathathu, athembe ukuthi amnikeze injabulo ngokunqoba kulisizini.
Umqeqetshi lo uthe kunyanga ezimbili elolonga abadlali laba, ubakhuthaze ukuthi baqaphele ukuzeyisa kodwa bazinikeze isibindi sokuwisa lamathimu ayesatshwayo kuligi.
Isizini yeCastle Lager iqala ngempelaviki ezayo mhlaka 2 kuMabasa. ITsholotsho yemuka emlonyeni wengwenya ngo2015 ngokuvala isizini elenge kunombolo yetshumi lambili.
USweswe uthe okwenzakala ngo2015 kwabyiasifundo sokuthi kumele banqobe okuzwayo kumidlalo yokuqala.
“Inhloso yethu njengokubika kwami ngoZibandlela mhla siqala amalungiselelo ethu yikuthi sidlalele ukungakhitshwa kuligi. Ngesizini okuqakathekileyo yikunganqotshwa nxa sidlala koBulawayo,” kutsho uSweswe.
Uqhubekele phambili wathi : “Ayisikho ukuthi siyethusela kodwa sithi akulanto esiyesabayo khathesi kuligi yePSL.
Ithimu yonke ekuligi le izimisele, nxa singanqotshwa kutsho ukuba asisebenzanga kakuhle. Amanye amathimu yiwo okumele ayesabe.”
Kumdlalo wayo waokuqala, ITsholotsho izadibana leqembu lezimbamgodi iFC Platinum. Kuviki lesibili Iziqholo zeZhwane zilubhekisa enkundleni zeBulawayo City anduba zidlale leHighlanders emagumeni.
USweswe uveze ukukhulukela ngokungaphezulu ngosekelo abaluthola kunkokheli lakubalalndeli bethimu.
Abadlali beTsholotsho FC kusizini ka2016:
Onozinti: Nickel Marichi, Chang Marion, Godwin Saungweme.
Imvimbi: Thandolwenkosi Ncube, Mclive Phiri, Spar Dube, Nkosilathi Moyo,William Stima, Trust Nyabinde.
Phakathi kwenkundla: Kriess Chitiyo, Simba Gorogodyo, Butholezwe Ncube, Colins Duhwa, Ocient Ncube, Bruno Madanhire, Paul Ngwenya, Xolani Ndlovu, Rodrick Mufudza, Leeroy Andrew, Ayanda Ncube.
Abagadli: Dylan Chivandire, Mostafa Ponyera, Blessing Sibanda, Nikolas Mundandishe, Nixon Gama, Lynoth Chikuhwa.
Online Reporter