Online Reporter
INKOKHELI zomdlalo we-Pool koBulawayo seziveze ukuthi zikhankasela ukuthi kuphunywe emabhawa, kudlalelwe endaweni ezihuga umphakathi wonke.
Lokhu kuza ngemva kokunanzelela ukuthi umdlalo lo usulosekelo olunengi njalo uthandwa ngabasakhulayo. Njengendlela yokuletha inhlonipho lokwamukelwa, abe-pool bathe imincintiswano yomdlalo sekumele isuswe emabhawa, kusetshenziswe indawo ezilokuthula lokuhlanzeka.
Bathe udumo lokuthi i-pool idlalelwa emabhawa sekumele luphele.
“Kulokukholwa ukuthi i-pool ngumdlalo webhawa. Sifuna ukukuqondisa lokhu koBulawayo lakwezinye indawo. Isizatho salokhu yikuthi sifuna ukuletha inhlonipho emdlalweni.
“Sinanzelela ukuthi kulabantu abathathela umdlalo wethu phansi ngenxa yokuthi ujwayeleke emabhawa. Kayisikho ukuthi ngumdlalo webhawa. Zikhona indawo ezinye indawo lapho edlalwa khona.
“Kumele abantwabethu abathanda lumdlalo bathole indawo eziphephileyo, ezingeke zibathwalise nzima bacine sebesenza okungayisikho. I-pool isithandwa ngabanengi koBulawayo ngakho kumele wonke umuntu, loba engumdlali, engumthandi kumbe engumsekeli athole ukuhlaliseka,” kutsho umongameli weQueens Pool Academy uTawanda Mupenzwa.
Umdlalo lo usuthuthuke waba ngumdlalo ophezulu, osekelwa ngemali njalo ulemincintiswano yamaligi emazweni lapho odlalwa khona.
Kusenjalo, iyaqhubeka imidlalo yeQueens International Pool Tournament lapho okulabadlali ebedlula ikhulu, abakuleli labavela kwamanye amazwe abalisela iZambia. Botswana, South Africa, Kenya, Tanzania, Eswatini lase-Uganda.
Umncintiswano lo ulemivuzo esekelwe nge-US$10 000.
“Umncintiswano lo uyibufakazi bamandla okuguquka kwezemidlalo. Sibona i-pool isenelisa ukukhuthaza ubungane, ukuhlangana kwabantu abavela endaweni ezitshiyeneyo lokunikeza amathuba empilweni. Sibonga abaxhasi bethu lonyaka abahlanganisela i-Nevsun Select, Ultra Food Premier Packaging le-Early Ashes,” kutsho uMupenzwa.
