Online Reporter
Peter Matika/ Faith Ndlovu/ Sikhulekelani Moyo
AMAKHOLWA esiKristu edlula inkulungwane ngeSonto angene ezitaladeni zakoBulawayo lakwezinye indawo kuleli enanza iSonto yamalala (iPalm Sunday), phambi kokuba kuqalwe ikhefu lePhasika ngoLwesihlanu kuliviki.
ISonto Yamalala ibaluleke kakhulu kukhalenda yesiKristu ngoba iyisikhumbuzo sokungena kukaJesu eJerusalema andubana ayebethelwa esiphambanweni.
UArchbishop Alex Thomas owebandla leRoman Catholic Archdiocese yakoBulawayo, obekhokhela ibandla lakhe enzikini yedolobho, uthe iSonto Yamalala yendlalela “iviki elingcwele” elinanzwa kuze kube yiGood Friday.
“UJesu engena edolobheni leJerusalema, abantu baphuma ngokuzithandela bayakwamukela iNkosi yabo, bevula indlela ngengatsha ezingcwele,” kutsho u-Archbishop Thomas.
U-Archbishop Thomas uthe uJesu wagezisa abafundi bakhe inyawo njengesitshengiselo sokuthobeka.
Uthe nge-Good Friday bakhumbula ukutshisekela, ukubethelwa, lokufa kukaJesu, okubizwa ngokuthi yi “Passion Service” kumbe ukuhlonitshwa kwesiphambano.
“Nge-Easter Saturday kulomkhosi wokukhumbula umlindelo wePhasika lapho abantu abazabe belindele ukuvuka kukaJesu. Nge-Easter Sunday abantu bazathakazelela ukuvuka kukaJesu,” ngu-Archbishop Thomas lo.
Umphurofethi uPenlop Zulu weRoyal Priesthood Solution Ministries uthe: “NjengeRoyal Priesthood Solution Ministries, sinanze iSonto Yamalala sisuka emgwaqweni ka-4th Avenue loJoshua Nkomo Street safika ku-23rd Avenue lapho ibandla lethu elikhona, siphelekezelwa ngamapholisa,”
UReverend Sikhalo Cele we-United Congregational Church of Southern Africa (UCCSA) uthe: “Amalungiselelo ethu ePhasika ahlanganisela ukuzila ukudla kweLent, inkonzo zeviki elingcwele lesikhumbuzo ngeSonto Yamalala, iMaudy Thursday, Good Friday le-Easter Sunday.”
Lamakholwa ebandla le Lutheran Church in Zimbabwe (ELCZ) bananze iPalm Sunday kumabandla abo wonke asemalokitshini koBulawayo agoqela eNjube, Mzilikazi, Tshabalala laseMganwini.
Umfundisi webandla leli koBulawayo uPhilisani Maphosa uthe: “IPhasika yisikhathi sokuzibeka, ukukhuleka lokubambana. Amalungiselelo ethu agoqela inkonzo zemvuselelo, ukuzila ukudla lokuhlela imihlangano.”
Umkhokheli webandla leHarvest House International Church, uBishop Collin Nyathi, uthe loba bengasoze benze imikhosi ethile, bazagxila kunkonzo yosuku lokuvuka kukaJesu.
“Yilapho esitshumayela khona ngokufa, ukungcwatshwa lokuvuka kukaJesu Kristu. Yonke eminye imikhosi siyayihlonipha, kodwa omkhulu yisikhumbuzo sikaKhristu.”
