admin
Ethel Ncube
ZISELE zikhakhamele izakhamizi zeChipale eBinga kukhithika iqatha lenyama ebhulugweni lenye indoda ebicelwe ukuthi izoncedisa ukuhlinza, uMthunywa ukuzwile lokhu.
UMnumzana Saviour Gumbo kubikwa ukhithize iqatha lenyama leli ngesikhathi sokuthwalwa inyama isiwa kwenye indlu ngeviki ephelileyo.
Esinye isakhamuzi esikhulume loMthunywa esasikhona kukhithika inyama ebhulugweni likaGumbo, uMnumzana Daniel Nleya uthe lokhe engelankani ngendoda etshontsha inyama iyifihle phakathi kwebhulugwe.
“Sasicelwe komakhelwane ukuthi sizoncedisa ukuhlinza, uGumbo wabona kungcono ukuthi azisikele iqatha lenyama afihle. Kazange azihluphe ngokulinda amantshontsho esasizawanikwa. Asazi kumbe yikuthanda inyama okwamenza wenza lokhu.
“Sithe sesithwala inyama sisiyangena endlini uGumbo wathi ehamba kwakhithika inyama phakathi kwebhulugwe. Lwamtshaya lwameqa uvalo kodwa kwabanzima ukuthi alidobhe ngoba sonke sasimkhangele.
“Uthe lanxa esebuzwa ukuthi kungani kukhithika inyama ezigqokweni zakhe wehluleka ukuphendula wathi kakwazi ukuthi kuhamba njani,” kutsho uMnu Nleya.
UMthunywa ukhulume lesinye isakhamuzi esasikhona laso ngesikhathi kusiwa inyama le, uMnumzana Prince Shumba.
“Sasihlinza sithe sesithwala inyama siyingenisa ngekhaya sisuka layo esibayeni omunye wethu kwakhithika inyama ebhulugweni ayeligqokile kumbe wayeyifihle kusigqoko sakhe sangasese asazi. Sambuza ukuthi kanti inyama le ivela ngaphi wehluleka ukuphendula wagagasa wangazwakali ukuthi uthini,” kubika uMnu Shumba.
Ekhuluma lentatheli uMnu Gumbo okwakhithika kuye iqatha lenyama uveze ukuba inyama yawa eduze kwakhe.
“Inyama yawa eduze kwami ungizwisise kuhle, kodwa ayisikho ukuthi ngangitshontshile ngicabanga ukuthi kumbe yanamathela ngingaboni abantu sebesithi ngasengitshontshile,” kuphetha uMnu Gumbo.
Online Reporter