admin
Ethel Ncube
KULENINA okucatshangelwa ukuthi lingumthakathi elitholakale lizulazula egumeni lomunye umphurofethi elokitshini leMpopoma koBulawayo ngeviki ephelileyo.
Kubikwa inina leli okucatshangelwa ukuthi beliphapha ngengcebethu yalo liwele emzini kamphurofethi owaziwa ngokuthi Mduduzi “Black Elisha” Dube.
UMnumzana Given Moyo oyisakhamuzi kulelilokitshi uthe wayekhona mhla kusenzakala lokhu njalo ungomunye walabo abagijima bayazibonela ngawabo inina leli elalihamba ze lisegumeni likamphurofethi.
“Umama lo wayenqunu egqoke isudu yokuzalwa ethi wayezobona ukuthi endlini kamphurofethi kuthiwa kulemikhonto esebenza ukwelapha ngenjani kanti kabuzanga elangeni.
“Inina leli kukhanya lawela egumeni likamphurofethi owayekhuleka emadabukakusa laqala ukuzulazula egumeni.
“Abafika kuqala bathi bafica inina leli lizulazula lithi lifuna ukubona ukuthi umphurofethi lo adume ngakho kuyasebenza sibili,” kubika uMnu Moyo
Uqhubekele phambili wathi umama lo bambuza ukuba ufike njani lapho njalo ulandeni ubezobona ukuthi umphurofethi ohlala la ulamandla sibili kumbe hatshi.
“Bambuza ukuthi udingani lapha waveza ukuba ubezama ukubona ukuthi umphurofethi lo ulamandla sibili njalo ubefuna ukubona lemikhonto ayelapha ngayo wathola kuxhibiwe kungangeneki wahle wawela phansi. Ukuthi ungubani wakuveza konke ibizo lesibongo.
“Umphurofethi wamzwela wathi abantu bamnike impahla azihambele ngakibo,” kutsho uMnu Moyo.
Intatheli ixhumane loBlack Elisha oqinisekise ukuthi lokhu kwenzakala egumeni lakhe.
“Ngathi ngikhuleka emadabukakusa ngezwa angani kulomuntu ohambahambayo phandle ngavula umnyango ngathola elinye inina libhunyumunyu lithwele ukhomane olulomuthi omnyama phakathi. Ngalibuza ukuthi lidingani, khonokho nje laphosela phansi ukhomane lwalo lithi kumbe lizenelisa ukubaleka, kwehlula. Lithe libona ukuthi kunzima ukucela ezinyaweni lahle laxolisa.
“Ngamzwela ngathi kazibuyelele lapho avela khona, angaqali ukuhamba ebusuku ezindlini zabantu, uzalimala ngoba indlu elomkhonto loba kuthiwa ungumthakathi onjani vele awungeni kiyo ngoba ulamandla okulwisana lezinto ezimbi,’’ kuphetha uMphurofethi uBlack Elisha.
Online Reporter