admin
Thokozile Mbedzi
ZILOKHU zinkemile izakhamizi zelokitshini lePrayer Road eChiredzi ngemva kokuba enye indoda ibulele inina ebiphilisana lalo andubana iyocatsha emangcwabeni.
Kubikwa uToruvanda Obvious Tshorovanda oleminyaka engu-22 ugwaze wabulala umasihlalisane wakhe uPaidamoyo Manika oleminyaka engu-25 ngemva kokuxabana mhlaka 25 Zibandlela.
Ekhuluma lentatheli kaMthunywa uNkosazana Shyline Moyo uthe babone into yamehlo.
“Ababili laba baxabana phakathi kobusuku omakhelwane bavuswa ngumsindo wabo.
“Ngehola lika-3 ekuseni uRuvatashe Jara ongomunye laye oloja endlini lapho okuhlala khona ababili laba, uthe wathi engena endlini yabo esezwe umsindo wahlangabezwa ligazi elaligcwele endlini. UPaida yena wayevele esethe daca phansi enqunu njalo esequlekile.
“URuvarashe kazange aphozise amaseko wahle wayabikela udadewabo kaPaidamoyo, uSithokozile ngesiga lesi,” kulandisa uNkszn Moyo.
“Bathe befika endlini bathola uPaida elenxeba elikhulu emlenzeni wesandleni senxele okwenza bamthwalela esibhedlela seChiredzi General Hosiptal lapho abathi befika laye kwathiwa usedlule emhlabeni.
UMthunywa uzwe njalo ukuthi uTshorovanda ebona ukuthi uselimaze uManika wabaleka wayacatsha emangcwabeni lapho abotshelwa khona.
Isikhulumi samapholisa esabelweni seMasvingo ulnspector Kudakwashe Dewa ebuzwa ngodaba lolu uthe solufikile ehofisini yabo.
“Udaba lwenina elibulewe yindoda ebihlalisane layo solufikile ehofisini yethu ngakho sikhuthaza uzulu ukuthi nxa elenkinga kaxazulule inkinga lezi ngokukhulumisana hatshi ngokuphatheka kudlame.
Abazali, izihlobo kunye labaphathi bezigaba loba amapholisa bangaphathisa kulokhu,” kuphetha ulnsp Dewa.
Online Reporter