Online Reporter
Fungai Muderere
UMQEQETSHI omutsha weHighlanders, uBenjani “The Undertaker” Mwaruwari, uthe zonke inhlelo zakhe zihamba ngendlela afuna ngayo njalo uzakwakha iqembu elizancintisela ukuba zintshantshu zeCastle Lager Premier Soccer League ka-2026.
UMwaruwari ukhulume lokhu ngemva kokuba iBosso inqobe izitha zayo zakudala, iDynamos, nge 1-0 emdlalweni wenkezo yeJairos Jiri Charity Cup obudlalelwa eBarbourfields Stadium ngeSonto enkundleni ebigcwele phamu.
“Ngiyajabula ngoba abafana badlale ngokulandela amacebo engibanike wona. Abafana badlalile, futhi badlale kuhle sibili,” kutsho uMwaruwari ejabulile.
“Siphakathi kokwakha iqembu. Kasikafiki lapho esifuna ukufika khona, kodwa siyakha njalo sihamba ngendlela eqondileyo. Sisalungiselela isizini entsha.”
Umqeqetshi lo ukhulume ngokuthi ukudlalela eBarbourfields kutsho okunengi kuye.
“IBarbourfields Stadium iyindawo eqakathekileyo kimi. Ngakhulela lapha, ngadlalela lapha njalo ngiyajabula ukuthola ithuba lokuqeqetsha iHighlanders. Ekuqaleni kwakungathi kuyahlekisa, kodwa khathesi sengikubona kusenzeka. Ngiyajabula ukusebenza phambi kwezihlobo zami, lemuli yami,” kutsho lumqeqetshi ebobotheka.
Umqeqetshi weDynamos, uGenesis “Kaka” Mangombe, uthe labo basazama ukuhlanganisa iqembu eliqinileyo.
Ibhola elilodwa leBosso lihlohlwe kusigaba sesibili somdlalo ngumgadli weNigeria uBenjamin Odeugun.
UMangombe, owake waqeqetsha iTriangle United nyakenye, uthe: “Sisazama ukuhlanganisa abadlali ngendlela ezasipha iqembu eliqinileyo. Ngiyathokoza ngendlela esizama ngayo ukwakha sisuka emuva.
“Ukudlala leHighlanders kunzima, kodwa ngumdlalo webhola. Lathi silabadlali abaqine ngokufanayo. Mina ngigxila kokuhle kuphela.
“Ukudlalela iDynamos akulula. Kumele unqobe. Abalandeli bayajabula nxa iqembu linqoba,” kutsho uMangombe.
Kodwa, uveze ukukhathazeka ngendlela abadlali bakhe abazivikele ngayo, ebika ukuba ibhola elingenileyo bekungamelanga livunyelwe, ikakhulu lisuka eceleni eliseduze.
Umlilo wokuncintisana phakathi kweHighlanders leDynamos uzavutha njalo kuPSL ngeviki lesibili lesizini amaqembu womabili ehlangana eRufaro Stadium.
