Londile Moyo
Lovemore Dube
IQEMBU leHighlanders FC lithole umklomelo owodwa ngemva kokuba umgadli walo uBenjamin Adegoun, ehlohle umbekwa sekusele imizuzu embalwa ukuthi umdlalo uphele ngesikhathi ibambana nge 1-1 le Bulawayo Chiefs, kumdlalo weCastle Lager Premier Soccer League obudlalelwa eBarbourfields Stadium ngeSonto.
Umbekwa lo utholwe ngemva kokuba uMongameli Tshuma ewiselwe phansi phakathi kwebhokisi.
Umdlali weBulawayo Chiefs uZibusiso Dambo ulethe injabulo kubalandeli ngemva kokusebenzisa iphutha labadlali beBosso ekuvikeleni, watshaya ibhola eliqatha ngomzuzu wesi-28 esuka ngaphandle kwebhokisi.
Lo bekungumdlalo wokuqala weCastle Lager Premiership edolobheni lakoBulawayo kulisizini, ubukelwe ngabalandeli abalinganiselwa ku-10 000.
Kumizuzu yokuqala yomdlalo ibinjengo kujwayelekile kuma-derby. Iqembu ngalinye lilwela ukulawula umdlalo. UClive Rupiya ubengenelisa ukuthi ahlohlele iChiefs ngomzuzu wetshumi kodwa ibhola ledlule eceleni.
IBosso layo ithole ithuba ngomzuzu we-17 lapho Marvin Sibanda ezama ukuhlasela nge-header ngemva kwebhola elivele kuMongameli Tshuma, lihlelwe nguDarlington Munkuli, kodwa kwangabi khona okuphumayo.
IChiefs ihambe phambili ngomzuzu wesi-28 lapho Dambo athole ibhola, alithole enyaweni zikaPrince Ndlovu. Umgadli weChiefs uthathe amanyathelo ambalwa wasetshaya ibhola eliphansi elidlule kunozinti weBosso uReward Muza, langena emambuleni.
Phambilini u-Adegoun ubezame inhlanhla yakhe ngomzuzu wesi-20 ngemva kokuthola ibhola elivele kuSibanda, kodwa unozinti weChiefs uMatripples Muleya walivimba.
Ngemva komzuzu owodwa uWashington Mapuya laye uzame ukuligaxa, ebona ukuvuleka kwemvimbi zeBosso.
URupiya uphinde wathola ithuba ngomzuzu wesi-33 kodwa uMuza uvimbile ngemva kwephutha ekuvikeleni okwenziwe ngu-Archieford Faira.
Sekusondele ukuphela kwesigaba sokuqala, u-Adegoun uzamile ngomzuzu wesi-44 kodwa uMuleya uliphambukise kwaba yi-corner.
Online Reporter