Online Reporter
Nkosilathi Sibanda
UMJAHO weHighlanders Half Marathon ozakuba ngenyanga kaMfumfu, uzabalelwa kweminye ebaluleke kakhulu kwezokugijima kuleli.
Lonyaka umncintiswano ukhangelelwe ukuthi ubemkhulu njalo unxuse inengi lentshantshu zokugijima imango emide elizweni. IHighlanders Athletics Club, abaqoqi bomjaho, ibikele iZimpapers Sports Hub ukuthi sebevumela ukubhalisa labo abafuna ukuncintisa.
Umjaho uzabe umhlaka 5 Mfumfu njalo kuzancintiswa kumango ye-21km, 10km le5km.
Kubikwa umjaho lo uzasetshenzisa ekuncediseni iqembu leHighlanders FC kuhlelo lwayo lokwamukela ukuthakazelela ukufikisa iminyaka elikhulu ngomnyaka ozayo.
Umgcinisihlalo weHighlanders Athletics Club uLawrence Phiri uthe bafuna ukuthi lonyaka kube lotshintsho oluzaphakamisa lomdlalo wokugijima koBulawayo.
“Lonyaka, sinqume ukufaka umjaho we-21km njengendlela yokuhuga abagijimi abanengi lokuthi sibe lentshantshu ezizancintisa,” kutsho uPhiri.
Uthe kuzakuba lemivuzo kwabazanqoba.
“Abazagijima benqobe bazabongwa ngemivuzo. Kuqakathekile lokhu ngoba lathi kuHighlanders Athletics Club sikholelwa ekuphakamiseni ibizo lalabo abasixhasayo ukuze senelise lokunxusa wonke umuntu.”
