admin
Thokozile Mbedzi
ZILOKHU zinkemile izakhamizi zesiqintini seGutsa eShurugwi kulandela ukuzwa ngenye indoda ebulele enye ngoba isola ukuthi imthathele umakhalekhukhwini ebibheje ngayo emakhasini.
U-Ison Chibaya wabheja ngomakhalekhukwini emdlalweni wamakhasi ayewudlala loDingilizwe Dzingai.
Njengesivumelwano sabo uDzingai wahle wathatha umakhalekhukhwini walubhekisa emzini wakhe kodwa uChibaya kukhanya akumphathanga kuhle lokhu yiloba kunguye owayebheje ngomakhalekhukhwini.
Kubikwa uChibaya walandela uDzingai ngakibo wafika wavusa umsindo ethi yena usefuna umakhalekhukhwini wakhe.
Kubikwa kwabalokungezwani sibili phakathi kwalaba ababili okwacina kubangela ukuthi uChibaya ahlahlele uDzingai ngehloka.
Isikhulumi samapholisa esabelweni seMidlands uInspector Emmanuel Mahoko uthe bachwayisisa udaba lwendoda ebulele enye ngoba inqobe emakhasini.
“UDzingai wayedlala amakhasi labanye bakhe lapho uChibaya abheja ngomakhalekhukhwini wakhe wacina edliwe.
Kubikwa uDzingai esenqobile wasuka waqonda emzini wakhe andubana uChibaya alandele lomngane wakhe bafika bathi bafuna umakhalekhukhwini andubana amhlahlele ngehloka ekhanda.
UMthunywa uzwe njalo ukuthi uDzingai bamgijimisela esibhedlela lapho abhubhela khona ngosuku olulandelayo.
Isikhulumi samapholisa siphethe ngokuxwayisa uzulu ukuthi nxa bengazwanani bazame ukudinga ezinye indlela zokukhumisana umlotha kulokulwa.
Online Reporter