admin
Thokozile Mbedzi
EHLISE iphika amalunga emuli yakoBenard eBellevue koBulawayo kulandela ukubotshwa kwamadoda amathathu abulala isihlobo sawo.
Amapholisa akoBulawayo abophe uClever Dube oleminyaka engu-29 wePumula Old, uBrian Muthandwa oleminyaka engu-22 weNtumbane Kanye loJabulani Ngwenya oleminyaka engu-25 ngecala lokubulala uPeters Bervan Bernard andubana batshontshe imali engange US$12 000 kunye lenkombalanga ngenyanga kaZibandlela lonyaka.
Kubikwa uThembelani Ncube nguye ongakabotshwa. Kuzwakale ukuthi abane laba bavumelana ukuthi bayegqekeza lokubulala.
Isikhulumi samapholisa akoBulawayo uInspector Abedinico Ncube uthe babophe amadoda amathathu omunye wabo kakabotshwa ngecala lokubulala.
“Sibophe amadoda amathathu uClever Dube, uBrain Muthandwa, Jabulani Ngulube owesine usadingwa. Abathathu laba asebesezandleni zamapholisa betheswa icala lokubulala uPeter Bervan Bernard.
“Abane laba kucatshangelwa ukuthi bagqekeza endlini kaBenard mhlaka 21 Zibandlela bambulala andubana bathathe imali engange US$12 000 lenkombalanga,” kuchaza uInsp Ncube.
Amapholisa abonge kakhulu uzulu ngokubaphathisa ukuthi kubotshwe amadoda la amathathu. “Sibonga ukusebenzelana kuhle lozulu ngakho sicela aqhubeke esiphathisa senelise njalo ukubopha uThembelani.
“Siyabonga njalo ngoba lonyaka kasamukelanga amacala amanengi kakhulu okugqekezwa kwezimota lamanye amacala kumbukiso weZimbabwe International Trade Fair ngenxa yokuthi besisebenzelana kuhle lozulu,” kuphetha uInsp Ncube.
Online Reporter