admin
Ethel Ncube
ZISELE zingelankani izakhamizi zeMahawana eMbembesi ngemva kokuba enye indoda ibulele umfowabo ngoba imthole encinda uluju lwemvelo lomzawakhe.
Umuyi uMphathisi Masoka kubikwa ubulewe ngumntakayise omdala uHoyi Nzombane ngoba emthole esemacansini lonkosazana Derby Nzombane emguyweni ngoLwesihlanu oludluleyo.
Kuzwakale ukuthi uHoyi watshaya uMphathisi ngesitulo ethi uyamkhuza ukuthi angenzi lokho abakwenzayo ngoba bengabantu banye, nanko uDerby ngumntakababakazi wabo, ngokuswelakala kwenhlanhla uMasoka wedlula emhlabeni.
UMthunywa uxhumane lelinye ilunga lemuli njalo okunguye okucatshangelwa ukuba watholakala elomuyi uDerby Nzombane ovumileyo ukuthi isiga lesi senzakala.
“Sasinatha sisemguyweni kodwa ukuthi kwenzakalani sibisibili kangisaqondi ngoba ngasengiphandliwe kodwa ngezwa sengitshelwa ukuba uMphathisi usedlule emhlabeni njalo utshaywe nguHoyi ngoba esithi umthole esemacansini lami.
“Mina akukho engakusolayo okungenza ngibone angathi ngahlukuluzwa ngumuntu wesilisa. UMphathisi loHoyi siyizihlobo ukuthi balwe njani kwaze kwafika kusigaba esinje lami angikwazi sibili,” kubika uNkszn Nzombane.
Induna yesigabeni lesi, uDumisani Ndondo ikhuluma loMthunywa ichaze ukuba udaba olunjalo lwenzakala endaweni yakhe.
“Abantu laba babesemguyweni mina kangihambi ngenxa yeCovid -19 ngokuzwa kwami omunye babemkhuza bacina bengazwisisani omunye wadobha isitulo ngokuzonda watshaya uMphathisi ekhanda wedlula emhlabeni,” kuphetha induna uNdondo.
Online Reporter