Online Reporter
Nkosilathi Sibanda
UKWEMBIWA kwegolide phakathi kwemifula sekuphazamise inhlelo zokudonswa kwamanzi anathwa koBulawayo, osekudale ukuthi ikhansili yalelidobholo iqinise umkhankaso wayo wokubopha otsheketsha asebebhahile kumifula esesigabeni seMzingwane.
Kubikwa sekubotshwe amakorokoza angu-47 emba igolide okungekho emthethweni, kusiyaphela uNhlangula lonyaka.
Imifula yamanzi akoBulawayo iseMzingwane, esabelweni seMatabeleland South lapho okulendawo ezilegolide elinengi njalo otsheketsha bandise ukugebha emaceleni omfula kumbe phakathi.
Ikhansili yakoBulawayo, kumbiko wayo weviki, ithe otsheketsha babhidliza lempompi zamanzi.
Loba lonyaka kwaba lezulu elinengi, umqondisi wogatsha lweHousing and Community Services uMnumzana Dictor Khumalo, uthe amadamu kawagcinanga amanzi aneleyo, okwadalwa yimisebenzi yabotsheketsha emifuleni.
Uthe bazaqhubeka bebhoda kulezi indawo, bexotsha otsheketsha laba.
“Siqaphele njalo nje. Siyabhoda sihlola indawo zethu zamanzi. Saqala ngokubopha otsheketsha abangu-11, sabahambisa kuZimbabwe Republic Police, eSigodini. Kusukela ngoZibandlela, sekubotshwe abangu-47.
“Sathola impahla abazisebenzisayo zokugebha igolide ezingu-52, ezigoqela ama-detector. Konke lokhu sakunikeza amapholisa,” kutsho uMnu Khumalo.
Ubike ukuthi bathola lenqola lamabhara.
Ekhuluma ngezimbamgodi esezihluphile eKumalo, osabambe isikhundla sikamqondisi wogatsha lweWorks ekhansilini, uMethuseli Dibidi uthe kusiyaphambili ikhansili izazama ukuthi ivale indawo lezi ngokwengeza amapholisa ayo ukuze kuxotshwe otsheketsha.
